2026 jylǧy 5 aqpanda Rudnyi qalasynda 900 orynǧa arnalǧan memlekettık tılde oqytatyn №8 jalpy bılım beretın jaŋa mektep aşyldy. Osy aituly kündı oquşylar jäne olardyŋ ata-analary asyǧa kütken bolatyn.
Oblys äkımınıŋ orynbasary Baqytjan Narymbetov qūttyqtau sözınde: «Osy mekteptıŋ aşyluy el Täuelsızdıgınıŋ 35 jyldyǧymen, sondai-aq qazaq halqynyŋ ūly aǧartuşysy, bızdıŋ jerlesımız Ybyrai Altynsarinnıŋ 185 jyldyǧymen tūspa-tūs kelıp otyr. Memleket basşysynyŋ bastamasymen ıske asyrylǧan "Keleşek mektepterı" Ūlttyq pilottyq jobasy şeŋberınde öŋır qalalary men audandarynda 4500 oryndyq 6 mektep aşyldy. Bızdıŋ öŋırımız Memleket basşysynyŋ tapsyrmasyn oryndady. Endıgı maqsat – osy mekteptıŋ äleuetın tiımdı paidalanyp, balalarǧa sapaly bılım beru jäne el damuyna üles qosatyn azamat etıp tärbieleu. Jaŋa mektep qūtty bolsyn! Barşaŋyzǧa sättılık, mektep ūjymyna jemıstı eŋbek pen tolaǧai tabystar tıleimın!», – dedı.
Rudnyi qalasynyŋ Qūrmettı azamaty, pedagogikalyq eŋbek ardagerı Ǧabdolla Ahmetjanov mekteptıŋ aşyluyna jinalǧan qauymdy qūttyqtap, öz batasyn berdı.
Bırınşı synyp oquşysynyŋ äjesı Raşila Kalenova jaŋa mektep öz oquşylarynyŋ ekınşı üiı bolatynyna senımdı. «Mektepte balalarymyzdyŋ jan-jaqty damuyna ülken mümkındıkter jasalǧan. Mūnda bılım alǧan oquşylar Qazaqstannyŋ patriottary, belsendı jäne sanaly azamattary bolyp ösedı degen senımdemın», - dedı.
Jaŋa mektepte oquşylardyŋ qabıletterın aşuǧa barlyq jaǧdailar jasalǧan. Kışı, orta jäne joǧary buyn üşın jeke bloktar qarastyrylǧan. Himiia, biologiia, fizika, informatika, robototehnika pändık kabinetterı, sondai-aq STEAM-zerthana oquşylardyŋ zertteu mädenietın damytuǧa mümkındık beredı.
Oqu kabinetterı kompiuterlık jabdyqtarmen, interaktivtı taqtalarmen, şet tılder kabinetterı - lingafondarmen jaraqtalǧan. Mektepte qajettı qūraldarymen 3 sport zaly, horeografiia zaly, jaily ashana bar. Eŋbekke baulu şeberhanalarynda stanoktar jäne tıgın jabdyqtary qoiylǧan.
Aulada oquşylardy jan-jaqty damytu üşın qozǧalys oiyndarǧa jäne demaluǧa arnalǧan alaŋdar ornatylǧan.
Mektep direktory Qymbat Bırmanova mektep erekşe bılım beru qajettılıgı bar balalarǧa beiımdelgenın atap öttı: mümkındıgı şekteulı azamattar üşın lift, pandustar jūmys ısteidı, arnaiy sanitarlyq bölmeler jabdyqtalǧan, inkliuziiany qoldau kabinetı qyzmetın bastady.
6 synyp oquşysy Ajar Rüstemova öz quanyşymen bölıstı: «Mekteptıŋ kıtaphanasy öte ülken eken! Kıtap qory bızge oquda qajet jäne qosymşa elımızdıŋ tarihi, mädeni mūrasymen tanysuǧa mümkındık beredı. Yŋǧaily jäne jaily kovorking aimaqtar men öner studiiasyn körıp taŋqalyp otyrmyn, osy jerde bolaşaqta ıske asyratyn şyǧarmaşylyq josparlarymyz öte köp!»
Mektep Qostanai oblysy boiynşa Qazaqstandyq Ūlttyq IýNESKO klubtary federasiiasynyŋ öŋırlık üilestıruşısı qyzmetın atqaryp, osy salada halyqaralyq täjıribe almasu boiynşa belsendı jūmys jürgızudı josparlap otyr.
Kenşıler qalasy üşın mektepte 62 jaŋa jūmys ornynyŋ aşyluy maŋyzdy. Onyŋ 34-ı pedagogter, olarǧa sapaly bılım beru jäne oquşylardyŋ ziiatkerlık, sporttyq jäne şyǧarmaşylyq qabıletterın damytu üşın jasalǧan qolaily jaǧdailardy tolyǧymen paidalanu mındetı qoiylyp otyr.
Esterıŋızge sala keteiık, Ūlttyq joba aiasynda 4500 oryndyq 6 mektep aşyldy: Arqalyq qalasynda (300 oryn), Qostanai audanynyŋ Zarechnyi auylynda (900 oryn), ekı mektep Qostanai qalasynda (1200 jäne 900 oryn), Äulieköl audanynyŋ Qūsmūryn auylynda (300 oryn) jäne Rudnyi qalasynda (900 oryn)
