پارلامەنت ءماجىلىسىنىڭ دەپۋتاتى ماقسات تولىقباي الماتى وبلىسى، قاراساي اۋدانى، شالقار اۋىلىندا تولىق كۇردەلى جوندەۋدەن وتكەن مەكتەپ عيماراتىنىڭ 15 ميلليون تەڭگەگە ساتىلىپ كەتكەنى جايلى ماسەلە كوتەرىپ ەدى. ءبىز بۇگىن دەپۋتات ماقسات تولىقبايعا تۋرا وسىعان ۇقساس پروبلەما بىزدە دە بار ەكەنىن مالىمدەگىمىز كەلەدى. ۇرپاق بولاشاعى ءۇشىن شىرىلداعان اتا-انالاردىڭ جانايقايىن دەپۋتات ءماجىلىس قابىرعاسىنان كوتەرىپ، بالالارىمىزدىڭ وزگە جەتكىنشەكتەرمەن تەڭ قۇقىلى ءبىلىم الۋىنا مۇمكىندىك جاساپ بەرەر دەگەن ءۇمىتىمىز بار.
قۇرمەتتى، ماقسات تولىقباي مىرزا!
ءبىز الماتى وبلىسى، قاراساي اۋدانى، قاسكەلەڭ قالاسىنىڭ، حاليفا التاي، سۋىقبۇلاق، بالقاش، ەسىل كوشەلەرى باستاعان ون-ون بەس كوشەنىڭ تۇرعىندارىمىز. ءبىزدىڭ تۇرعان جەردى دەموگرافياسى قارقىندى دامىعان اتى جوق شاعىن اۋدان دەسە دە بولادى. قاراساي اۋداندىق ءماسليحاتىنىڭ 09.01.2020 جىلى №54-4 شەشىمىمەن بەكىتىلگەن قاسكەلەڭ قالاسىنىڭ باس جوسپارىندا ءبىز تۇرعان اۋماققا مەكتەپ عيماراتىنىڭ بوي كوتەرەتىنى انىق كورسەتىلگەن. اتالعان اۋماققا جۇرت جاپپاي قونىستانعانىنا 12 جىلدان استى. حالىق "مەكتەپ سالىنادى" دەپ 12 جىل بويى زارىعا كۇتكەن سول اۋماق جەكەمەنشىككە ساتىلىپ كەتىپتى.
ءبىزدىڭ قاراساي اۋدان اكىمىنە جازعان حاتىمىزعا "جەردى مەملەكەت مۇقتاجدىعى ءۇشىن قايتا ساتىپ الۋعا جانە مەكتەپ قۇرىلىسىنا 2023 جىلعا قاراجات قاراستىرىلماعانى" تۋرالى قاراساي اۋدانىنىڭ "قۇرىلىس، ساۋلەت جانە قالاقۇرىلىسى ءبولىمىنىڭ" جاۋابى كەلدى. ەسەسىنە، ساتىلىپ كەتكەن جەرگە بوي كوتەرۋگە ءتيىس مەكتەپ، "جايلى مەكتەپ" جوباسىمەن "التىن اۋىل" شاعىن اۋدانىنداعى ەسكى مەكتەپتىڭ قاسىنا سالىناتىن بولىپتى.
"التىن اۋىل" شاعىن اۋدانى مەن ءبىز تۇرعان جەردىڭ اراسى ءتورت شاقىرىم جەر. ءبىزدىڭ بالالارىمىز جيىرما جىلدان بەرى ونسىز دا سول "التىن اۋىل" شاعىن اۋدانىنداعى مەكتەپكە قاتىناپ، اياقتارىنان توزىپ ءجۇر. قىستىڭ كوزى قىراۋدا مەكتەپ تابالدىرىعىن ەندى اتتاعان 6-7 جاستاعى بالانىڭ 4 شاقىرىم جەردەگى مەكتەپكە جاياۋ باراتىنى، ۇيىنە تاعى 4 شاقىرىم جەر جاياۋ قايتاتىنى، كۇنىنە ءار بالا مىندەتتى ءبىلىمىن الۋ ءۇشىن 8 شاقىرىم جاياۋ جۇرەتىنى اۋدان اتقامىنەرلەرىن ويلاندىرماي وتىر. ۇلكەن سىنىپتار قوسىمشا ساباق، مەكتەپتىڭ ءتۇرلى شارالارىنا باراتىن كەزدەرى دە ءجيى بولىپ تۇرادى. مۇنداي كۇندەرى 8 شاقىرىم جول 16 شاقىرىمعا ۇزارادى. ونىڭ ۇستىندە كوشەلەردە جارىق جوق. ءار اتا-انا قاراڭعىدا بالالارىنىڭ امان-ەسەن ۇيىنە قايتۋىن ۋايىمداۋمەن وتىرادى. بولماسا، بالا-شاعاسىن مەكتەپتەن كۇتىپ الىپ، ولار دا 8 شاقىرىم جەردى جاياۋ جۇرۋگە ءماجبۇر. كوشە تولعان يت. بالالار مەكتەپكە بارىپ-كەلۋ تاۋقىمەتىمەن قوسا، يتتەرمەن ارپالىسۋعا ءماجبۇر. مەكتەپكە بارار جولدىڭ تەڭ جارىمىنان كوبىندە اسفالت توسەلمەگەن. اسفالت توسەلگەن جول تار. ماشينالار ول جولدا وتە جىلدام جۇرەدى. بالالارىمىزدى كولىك قاعىپ كەتۋى ابدەن مۇمكىن ەكەنى ايتپاسا دا تۇسىنىكتى.
اۋدان شەندىلەرى ءبىزدى ىلعي دا سابىرعا شاقىرۋمەن، ۋادە بەرۋمەن الداپ كەلەدى. شىدامنىڭ دا شەگى بار. مەملەكەتتىڭ قولداۋىمەن "جايلى مەكتەپ" جوباسىمەن سالىناتىن ءبىلىم ورداسى قالانىڭ باس جوسپارىندا كورسەتىلگەن، قازىر جەكە قولعا ساتىلىپ كەتكەن جەرگە سالىنۋىن تالاپ ەتەمىز. سەبەبى، ول جەر ءالى كۇنگە بوس تۇر. ەشقانداي قۇرىلىس سالىنا قويمادى.
مەملەكەت اۋدانىمىزعا "جايلى مەكتەپ" باعدارلاماسىمەن ءبىلىم وشاعىن سالۋعا قاراجات ءبولىپ وتىر. ول مەكتەپ 4 شاقىرىم جەر قاشىقتاعى ءبىزدىڭ كوشەلەرگە جايلى بولمايىن دەپ تۇر. لوگيكاعا سۇيەنسەك، مەملەكەت بولگەن قارجىعا مەكتەبى جوق اۋماققا ءبىلىم ورداسى سالىنۋى كەرەك ەمەس پە؟ جوق الدە، قاراسايلىق شەنەۋنىكتەر شالقار اۋىلىنداعى سياقتى ەسكى مەكتەپتىڭ جانىنان جاڭاسىن سالىپ، ەسكى مەكتەپتىڭ عيماراتىن دا ساتىپ جىبەرۋدى جوسپارلاپ وتىر ما؟ ارينە، كۇدىك كەلتىرۋگە حاقىمىز بار دەپ ويلايمىز!
قۇرمەتتى، ماقسات تولىقباي مىرزا!
قاراسايلىق قارا حالىقتىڭ بۇل ءوتىنىشىن جەردە قالدىرماي، "جايلى مەكتەپ" جوباسىمەن سالىنعالى جاتقان مەكتەپ عيماراتىن تۇرعىنى كوپ اۋماققا، قالانىڭ باس جوسپارىندا كورسەتىلگەن جەرگە بوي كوتەرۋىنە ىقپال ەتۋىڭىزدى وتىنەمىز! ءبىزدىڭ بالالارىمىز دا وزگە جەتكىنشەكتەردەي جاقىن جەردەگى مەكتەپتە وقىپ، ءبىلىم الۋعا قۇقى بار. ەل سەنىمىنە يە بولعان دەپۋتات رەتىندە سول بۇلدىرشىندەردىڭ قۇقىعىن ءوز بالاسىنىڭ قۇقىعىنداي قورعايدى دەپ ءبىر وزىڭىزگە سەنىم ارتىپ وتىرمىز!
قۇرمەتپەن، مىڭداعان اتا-انانىڭ اتىنان سەرىك ساقتاعان
Adyrna.kz
