قارجى مونيتورينگى اگەنتتىگى ەربولات ءجانابىلوۆ پەن ەلميرا تولەگەنوۆاعا قاتىستى سوتقا دەيىنگى تەرگەپ-تەكسەرۋدى اياقتادى، دەپ حابارلايدى «ادىرنا» ءتىلشىسى.
قما استانا قالاسى بويىنشا دەپارتامەنتى مالىمەتىنشە، بلوگەرلەر ءوز جازىلۋشىلارىنىڭ سەنىمىن زاڭسىز تابىس تابۋ ماقساتىندا پايدالانعان. 2025 جىلى ولار ونلاين-كۋرستاردى ساتۋ دەگەن جەلەۋمەن زاڭسىز سحەما ۇيىمداستىرعان. اتالعان «كۋرستاردى» ساتىپ الۋدىڭ نەگىزگى سەبەبى – قىمبات سىيلىقتار ۇتىسىنا قاتىسۋ بولعان.
«تاراتىلعان بەينەماتەريالدار باسىم بولىگى باسىم بولىگى اشىق دەرەككوزدەردەن، سونىڭ ىشىندە YouTube پلاتفورماسىنان الىنعان. بۇل كۋرستاردىڭ ناقتى ءبىلىم بەرۋ قۇندىلىعى بولماعان جانە ولار زاڭسىز لوتەرەيا قىزمەتىن فورمالدى تۇردە جاسىرۋ ءۇشىن عانا پايدالانىلعان.
جۇلدە قورى جاريا تۇردە مالىمدەلگەندەي جەكە قاراجاتى ەسەبىنەن ەمەس، ونلاين-كۋرستارعا اقى تولەۋ تۇرىندە قاتىسۋشىلاردان تۇسكەن اقشا قاراجاتى ەسەبىنەن قالىپتاستىرىلعان.
ەلەكتروندى «ساتتىلىك بارابانىنىڭ» پارامەترلەرىن وزگەرتۋ فاكتىلەرى انىقتالدى، سونىڭ ناتيجەسىندە 5 000 تەڭگەلىك جۇلدەنى ۇتىپ الۋ ىقتيمالدىعى جاساندى تۇردە ارتتىرىلىپ، ال قۇندى جۇلدەلەردى ۇتىپ الۋ مۇمكىندىگى ەداۋىر تومەندەتىلگەن»،-دەلىنگەن حابارلامادا.
قما ايتۋىنشا، كۇدىكتىلەر جاريا تۇردە ەڭ كوپ رەپوست جاساعان قاتىسۋشىعا 11-ءنشى اۆتوكولىكتى تابىستالعانى تۋرالى مالىمدەپ, اكتسيانىڭ قامتۋ اياسىن كەڭەيتۋ مەن نازار اۋدارۋ ماقساتىن كوزدەگەن. الايدا ءىس جۇزىندە جەڭىمپاز انىقتالماعان جانە سىيلىق تابىستالماعان.
«ناتيجەسىندە ازاماتتاردان «Zhana Business» جشس-ءنىڭ باقىلاۋىنداعى شوتتارعا تۇسكەن قاراجاتتىڭ جالپى سوماسى 247,5 ملن تەڭگەنى قۇراعان، ونىڭ 60 ملن تەڭگەسى دەپوزيتتىك شوتتارعا ورنالاستىرىلعان. سوت سانكتسياسىمەن 17 iPhone ۇيالى تەلەفونىنا جانە Lamborghini Urus پەن Lexus LX 600 اۆتوكولىكتەرىن قوسا العاندا، 10 اۆتوكولىككە تىيىم سالىندى. كۇدىكتىلەرگە قاتىستى ۇيقاماق تۇرىندەگى بۇلتارتپاۋ شاراسى تاڭدالدى»،-دەپ تولىقتىردى اگەنتتىك.
قازىرگى ۋاقىتتا كۇدىكتىلەر قىلمىستىق ءىس ماتەريالدارىمەن تانىسۋعا كىرىسكەن. قازاقستان رەسپۋبليكاسى قىلمىستىق-پروتسەستىك كودەكسىنىڭ 201-بابىنا سايكەس وزگە اقپارات جاريا ەتۋگە جاتپايدى.
