قارجىلىق مونيتورينگ اگەنتتىگى پەريزات قايراتتىڭ تۋىستارى قىلمىستىق جولمەن الىنعان اقشاعا دۋبايدان بىرنەشە پاتەر ساتىپ الدى دەگەن اقپاراتتى جوققا شىعاردى، دەپ حابارلايدى «ادىرنا» ءتىلشىسى.
بۇعان دەيىن ءانونيمدى Telegram-ارنالارىنىڭ بىرىندە سوتتالعان پەريزات قايراتتىڭ تۋىستارىنىڭ دۋبايدا بىرنەشە پاتەرى بار ەكەنى تۋرالى اقپارات جاريالانعان.
اگەنتتىك مالىمەتىنشە، تەرگەۋ بارىسىندا بارلىق قارجىلىق وپەراتسيا جان-جاقتى تالدانىپ، جىمقىرىلعان قاراجاتتى زاڭداستىرۋ تىزبەگى انىقتالعان. پەريزات قايرات قايىرىمدىلىققا جينالعان اقشانى اۆتوكولىكتەر مەن پاتەرلەر ساتىپ الۋعا، ولاردى جوندەۋگە جانە جيھازبەن جابدىقتاۋعا، قىمبات كيىم-كەشەك پەن اشەكەي بۇيىمدارعا، بيزنەس-كلاسپەن ۇشۋعا، ءساندى قوناقۇيلەردە تۇرۋعا، مەيرامحانالار مەن ويىن-ساۋىق ورىندارىنا جۇمساعان.
سونىمەن قاتار اگەنتتىك ا. ەسىمدى ازاماتتىڭ وتباسى مۇشەلەرىمەن قانداي دا ءبىر قارجىلىق ەسەپ ايىرىسۋ جۇرگىزىلگەنى انىقتالماعانىن حابارلادى. جاريالانىمداردا ءسوز بولعان جىلجىمايتىن مۇلىك 2011–2019 جىلدارى، ياعني «Biz Birgemiz Qazaqstan 2030» قورى قۇرىلعانعا جانە پەريزات قايرات قىلمىستىق ارەكەتكە بارعانعا دەيىن ساتىپ الىنعان.
ۆەدومستۆونىڭ مالىمەتىنشە، ا. ەرلى-زايىپتىلارى 20 جىلدان استام ۋاقىت بويى جىلجىمايتىن مۇلىك ساتىپ الۋ جانە قايتا ساتۋمەن اينالىسىپ كەلەدى. ولار پەريزات قايرات پەن ونىڭ اناسىنان بولەك تۇرىپ، كاسىپكەرلىك قىزمەتىن دە دەربەس جۇرگىزگەن.
اگەنتتىك قىلمىستىق-پروتسەستىك كودەكستىڭ 161-بابىنا سايكەس، مۇلىكتى بۇعاتتاۋ مەن تاركىلەۋگە ونىڭ قىلمىستىق جولمەن الىنعانىن راستايتىن دالەلدەر بولعان جاعدايدا عانا جول بەرىلەتىنىن ەسكە سالدى. سونداي-اق كۇدىكتىلەرمەن تۋىستىق بايلانىسىنىڭ بولۋى وزدىگىنەن ادامدى قىلمىستىق جاۋاپكەرشىلىككە تارتۋعا نەمەسە ونىڭ مۇلكىن تاركىلەۋگە نەگىز بولا المايتىنىن اتاپ ءوتتى.
ەسكە سالايىق، 2025 جىلعى 25 شىلدەدە سوت پەريزات قايراتتى 10 جىلعا، ال ونىڭ اناسى عايني الاشباەۆانى 7 جىلعا باس بوستاندىعىنان ايىرعان ەدى. «Biz Birgemiz» قوعامدىق قورىنىڭ بۇرىنعى باسشىسى ادامدار توبىمەن الدىن الا ءسوز بايلاسىپ، اسا ءىرى مولشەردە الاياقتىق جاساعانى جانە قىلمىستىق جولمەن الىنعان اقشا مەن وزگە دە مۇلىكتى زاڭداستىرعانى (جىلىستاتقانى) ءۇشىن كىنالى دەپ تانىلعان.
