پرەمەر-مينيستر ولجاس بەكتەنوۆ ساۋدا جانە ينتەگراتسيا ءمينيسترى ارمان شاققاليەۆكە قازاقستاندىق تاۋارلاردىڭ ەكسپورتىن ارتتىرىپ، سىرتقى نارىقتارعا شىعۋ جۇمىسىن جانداندىرۋدى تاپسىردى، دەپ حابارلايدى "ادىرنا" ءتىلشىسى.
بۇل ماسەلە ۇكىمەت وتىرىسىندا كوتەرىلدى.
ءمينيستردىڭ مالىمەتىنشە، بيىلعى توعىز ايدا قازاقستانداعى ساۋدا كولەمى 61 تريلليون تەڭگەگە جەتىپ، وتكەن جىلدىڭ سايكەس كەزەڭىمەن سالىستىرعاندا شامامەن 16 پايىزعا وسكەن. ونىڭ ىشىندە كوتەرمە ساۋدا 16 پايىزدان استام، بولشەك ساۋدا 15 پايىزعا ارتقان.
ساۋدا ءوسىمىنىڭ 70 پايىزدان استامىن قالىپتاستىراتىن نەگىزگى ون تاۋار توبىنىڭ قاتارىندا اۆتوموبيلدەر، تۇرمىستىق تەحنيكا، فارماتسەۆتيكالىق ونىمدەر، سۋسىندار، ازىق-تۇلىك جانە قۇرىلىس ماتەريالدارى بار.
سونداي-اق ءمينيستردىڭ ايتۋىنشا، بيىلعى سەگىز ايدا شيكىزاتتىق ەمەس تاۋارلار مەن قىزمەتتەر ەكسپورتى 17 پايىزدان استام ءوسىپ، 28 ميلليارد اقش دوللارىنان اسقان. ال تاۋار ەكسپورتى 18 پايىزدان استام ءوسىپ، 21,5 ميلليارد دوللارعا جەتكەن.
ولجاس بەكتەنوۆ ىشكى نارىقتىڭ كولەمى شەكتەۋلى ەكەنىن اتاپ ءوتىپ، وتاندىق ونىمدەردى شەتەلدە وتكىزۋ جۇمىستارىن كۇشەيتۋ قاجەتتىگىن ايتتى.
«سىرتقى نارىقتارعا بەلسەندىرەك شىعۋ كەرەك. ىشكى نارىعىمىزدىڭ كولەمى ونشا ۇلكەن ەمەس، سوندىقتان جۇمىستى جانداندىرۋ قاجەت»، – دەدى ولجاس بەكتەنوۆ مينيسترگە.
