تۇڭعىش پرەزيدەنت نۇرسۇلتان نازارباەۆتىڭ قارىنداسى ءانيپا نازارباەۆاعا قاتىسى بار كومپانيا ەلىمىزدەگى ەڭ ءىرى سالىق بورىشكەرلەرى تىزىمىنە ەندى، دەپ حابارلايدى «ادىرنا» ءتىلشىسى tengrinews.kz-كە سىلتەمە جاساپ.
قازىرگى تاڭدا كومپانيانىڭ قارىزى 92 ملرد تەڭگەدەن اسادى.
«2026 جىلعى 1 قاڭتارداعى جاعداي بويىنشا "GROUP OF THE COMPANIES TDA" جشس-ءنىڭ سالىق جانە بيۋدجەتكە تولەنەتىن باسقا دا مىندەتتى تولەمدەر بويىنشا بەرەشەگى - 92 307 598 مىڭ تەڭگە»،-دەدى مەملەكەتتىك كىرىستەر كوميتەتى.
كوميتەت وكىلدەرى كومپانيانىڭ ءوزىن بانكروت دەپ تانۋ تۋرالى سوتقا تالاپ-ارىز بەرگەنىن مالىمدەدى. بۇل تالاپ-ارىز بويىنشا شەشىم قازىر سوتتىڭ قاراۋىندا.
2026 جىلعى 1 قاڭتارداعى ەڭ ءىرى سالىق بورىشكەرلەرىنىڭ توپ-5 ءتىزىمى ءانيپا نازارباەۆاعا قاتىسى بار كومپانيا ەڭ ءىرى سالىق بورىشكەرلەرى "انتي-رەيتينگىندە" "قۇرمەتتى" ءۇشىنشى ورىندى يەلەندى:
Ai-To Progress جشس – داۋرەن مولداعاليەۆ – 111,6 ملرد تەڭگە;
Alpha-bet (الفا-بەت) جشس – Velora Group LTD – 95,1 ملرد تەڭگە;
GROUP OF THE COMPANIES TDA جشس – ءالي كلىشپاەۆ، ءانيپا نازارباەۆا – 92,3 ملرد تەڭگە;
”OLIMP KZ" بۋكمەكەرلىك كەڭسەسى جشس – اناربەك جاۋىروۆ – 85,6 ملرد تەڭگە;
GB Invest جشس – فايەز نادجيب – 47,2 ملرد تەڭگە.
2025 جىلعى شىلدەدە «GROUP OF THE COMPANIES TDA» جشس قىتايدان تاۋاردى زاڭسىز اكەلگەنى جانە سالىق تولەۋدەن جالتارعانى ءۇشىن كىنالى دەپ تانىلعان. الماتى بويىنشا قما دەپارتامەنتى كومپانيانىڭ ۋاكىلەتتى ەكونوميكالىق وپەراتور مارتەبەسىنە يە بولا تۇرا، قىتايدان 100-دەن اسا كونتەينەر تاۋاردى زاڭسىز جولمەن كىرگىزگەنىن انىقتاعان.
سونداي-اق كومپانيا قوسىلعان قۇن سالىعىن، كورپوراتيۆ تابىس سالىعىن جانە كەدەن باجدارىن تولەمەۋ ءۇشىن ءوز باقىلاۋىنداعى 10 جشس-ءنى پايدالانىپ، جالعان شوت-فاكتۋرالار راسىمدەگەن. كەلتىرىلگەن زالال شامامەن 10 ميلليارد تەڭگە بولعان. سوت ءىس فيگۋرانتتارىنا 1 جىل 4 ايدان 4 جىل 6 ايعا دەيىن باس بوستاندىعىنان ايىرۋ جازاسىن تاعايىنداپ، مۇلكىن تاركىلەگەن. قاتىسۋشىلاردىڭ بىرەۋى حالىقارالىق ىزدەۋگە جاريالانعان.
تەرگەۋ بارىسىندا كومپانيا بيۋدجەتكە ەرىكتى تۇردە 643 ميلليون تەڭگە قايتارعانى ايتىلدى. سونىمەن قاتار، جشس-ءنىڭ 1,3 ملرد تەڭگەگە تاۋارلارى مەن 300 ملن تەڭگەگە مۇلكىنە تىيىم سالىنعانى حابارلانعان. بۇعان قوسا، تاعى 47 كونتراگەنت 240 ميلليون تەڭگە تولەگەن.
«Group of the Companies TDA» جشس 2014 جىلدان بەرى جۇمىس ىستەيدى. كومپانيا ناقتى ءبىر باعىتقا ماماندانباي، ءتۇرلى تاۋارلاردى كوتەرمە ساۋدامەن جەتكىزۋمەن اينالىسادى. قۇرىلتايشىلارى - ءانيپا نازارباەۆا مەن ءالي قىلىشباەۆ. ءالي قىلىشباەۆ 2021 جىلدان باستاپ كومپانيانىڭ باسشىسى رەتىندە كورسەتىلەدى.
