الماتىنىڭ تاۋلى ايماعىندا جاراقات العان شەتەلدىك تۋريست ەۆاكۋاتسيالاندى. بۇل تۋرالى توتەنشە جاعدايلار مينيسترلىگى مالىمدەدى، دەپ حابارلايدى "ادىرنا".
"112 پۋلتىنە مەدەۋ اۋدانىنا قاراستى بوگدانوۆيچ مۇزدىعى اۋدانىندا، تەڭىز دەڭگەيىنەن شامامەن 3500 مەتر بيىكتىكتە ءتۋريستىڭ جاراقات العانى تۋرالى حابارلاما تۇسكەن. الدىن الا مالىمەتتەرگە سايكەس، 1998 جىلى تۋعان ايەل باسىنان جاراقات الىپ، قان كەتكەن. ول وزدىگىنەن تومەن تۇسە الماعان", - دەلىنگەن تجم حابارلاماسىندا.
زارداپ شەككەن ازاماتشا قىتاي حالىق رەسپۋبليكاسىنان كەلگەن ءۇش تۋريستەن قۇرالعان توپ قۇرامىندا بولعان. ناقتى گەولوكاتسيا انىقتالعاننان كەيىن قۇتقارۋشىلار تۋريستەرگە جەتىپ، زارداپ شەككەن ايەلگە العاشقى مەديتسينالىق كومەك كورسەتتى. كەيىن ونى ەۆاكۋاتسيالاۋ تۋرالى شەشىم قابىلداندى.
ۇقساس جاڭالىقتار
