الماتىدا بولعان رەزونانستى جول-كولىك وقيعاسىنا بايلانىستى تەرگەۋ كۇشەيتىلدى، دەپ حابارلايدى "ادىرنا" ۇلتتىق پورتالى.
قازاقستان رەسپۋبليكاسى ىشكى ىستەر مينيسترلىگى مالىمەتىنشە، تەرگەۋدى كۇشەيتۋ تۋرالى تاپسىرما مەملەكەت باسشىسى قاسىم-جومارت توقاەۆ تاراپىنان 30 ناۋرىز كۇنى قاۋىپسىزدىك كەڭەسىنىڭ وتىرىسىندا بەرىلگەن.
ىشكى ىستەر ءمينيسترى ەرجان سادەنوۆ وقيعا بويىنشا جان-جاقتى ءارى وبەكتيۆتى تەرگەۋ جۇرگىزىلىپ جاتقانىن مالىمدەدى. اپات فاكتىسى بويىنشا قىلمىستىق ءىس قوزعالىپ، ZEEKR كولىگىنىڭ جۇرگىزۋشىسى سوت شەشىمىمەن قاماۋعا الىنعان. انىقتالعانداي، ول جول اپاتى كەزىندە ماس كۇيدە بولعان.
سونىمەن قاتار، بۇرىنعى پوليتسيا قىزمەتكەرىنىڭ ارەكەتسىزدىگى جانە مەملەكەتتىك نومىرلىك بەلگىلەردى زاڭسىز بەرۋ فاكتىلەرى بويىنشا دا قىلمىستىق ىستەر قوزعالدى. بۇل ىستەردى ءىىم-ءنىڭ ىشكى قاۋىپسىزدىك دەپارتامەنتى تەكسەرىپ جاتىر. قازىرگى ۋاقىتتا قوعامدىق كەڭىستىكتە تارالعان بارلىق اقپارات مۇقيات قارالۋدا.
وقيعانىڭ ءمان-جايىن تولىق ءارى ءادىل انىقتاۋ ءۇشىن الماتىعا ارنايى ءىىم كوميسسياسى جىبەرىلدى. ونىڭ قۇرامىنا ىشكى قاۋىپسىزدىك دەپارتامەنتى، اكىمشىلىك پوليتسيا كوميتەتى جانە كادرلارمەن جۇمىس دەپارتامەنتىنىڭ وكىلدەرى كىرگەن.
ۆەدومستۆو قالاداعى قوعامدىق ءتارتىپتى باقىلاۋدى دا كۇشەيتكەنىن اتاپ ءوتتى.
