ەۋروپا وداعى يران يسلام رەۆوليۋتسياسى ساقشىلار كورپۋسىن (كسير) تەرروريستىك ۇيىم دەپ تانىدى. شەشىم 29 قاڭتار كۇنى بريۋسسەل قالاسىندا وتكەن ەو ەلدەرى سىرتقى ىستەر مينيسترلەرىنىڭ كەزدەسۋىندە قابىلداندى. بۇل قادام تەگەرانعا قارسى جاڭا سانكتسيالار پاكەتىنىڭ نەگىزگى بولىگىنە اينالىپ، كسير-گە بايلانىستى قۇرىلىمداردى ەۋروپا اۋماعىندا قۋدالاۋدىڭ قۇقىقتىق مۇمكىندىگىن كەڭەيتەدى، دەپ حابارلايدى "ادىرنا" پورتالى Euronews-كە سىلتەپ.
سونىمەن قاتار ەو يرانعا قاتىستى قوسىمشا شەكتەۋ شارالارىن بەكىتتى: شامامەن 30 جەكە جانە زاڭدى تۇلعا سانكتسيا تىزىمىنە ەنگىزىلدى. بريۋسسەل ولاردى ەل ىشىندەگى رەپرەسسيالارعا جانە ۋكرايناداعى سوعىستى قولداۋعا قاتىسى بار دەپ سانايدى. ولاردىڭ ەۋرووداقتاعى اكتيۆتەرى بۇعاتتالادى، ەو ازاماتتارى مەن كومپانيالارىنا ولاردى قارجىلاندىرۋعا تىيىم سالىنادى، ۆيزا شەكتەۋلەرى ەنگىزىلىپ، ەكسپورتتىق باقىلاۋ كۇشەيتىلەدى.
يران يسلام رەۆوليۋتسياسى ساقشىلار كورپۋسىن جالپىەۋروپالىق تەرروريستىك تىزىمگە ەنگىزۋ تۋرالى شەشىم فرانتسيا بۇرىنعى قارسىلىعىنان باس تارتقاننان كەيىن مۇمكىن بولدى. پاريج بۇعان دەيىن قولدانىستاعى سانكتسيالارمەن قايتالانۋ قاۋپى جانە يران تۇرمەلەرىندەگى فرانتسۋز ازاماتتارىنىڭ تاعدىرىنا الاڭداۋشىلىق سەبەپتى بۇل باستامانى تەجەپ كەلگەن. سونداي-اق تەگەرانمەن سوڭعى ديالوگ ارنالارى ءۇزىلىپ قالا ما دەگەن قاۋىپ تە بولعان.
بريۋسسەلدە كسير يرانداعى يسلامدىق رەجيمدى قورعايتىن پاراللەل اسكەر رەتىندە سيپاتتالادى. ەو باعالاۋىنشا، ول جاپپاي نارازىلىقتاردى قاتاڭ باسىپ-جانشۋ ارەكەتتەرىنە قاتىسقان، سونىڭ سالدارىنان مىڭداعان ادام قازا تاۋىپ، ونداعان مىڭ ادام ۇستالعان، ينتەرنەت پەن بايلانىس كەڭ كولەمدە وشىرىلگەن.
ەۋروپالىق قۇقىق قورعاۋشىلار مەن كەيبىر مينيسترلەر قۇرباندار سانى ونداعان مىڭ بولۋى مۇمكىن دەيدى، ال يران بيلىگى قازا تاپقانداردىڭ تەك ءبىر بولىگىن عانا مويىنداپ، جاۋاپكەرشىلىكتى «لاڭكەستەرگە» جۇكتەيدى.
ەو-نىڭ سىرتقى ىستەر جانە قاۋىپسىزدىك ساياساتى جونىندەگى جوعارى وكىلى كايا كاللاس كسير-ءدى تەرروريستىك تىزىمگە ەنگىزۋ ونى ال-كايدا، حاماس جانە دايش سياقتى توپتارمەن ء«بىر دەڭگەيگە قوياتىنىن» ايتتى جانە تەگەرانعا ناقتى سيگنال بەرەتىنىن جەتكىزدى: «ەگەر تەرروريست سياقتى ارەكەت ەتسەڭ - تەرروريست رەتىندە قاراستىرىلاسىڭ». سونىمەن بىرگە ول سانكتسيالار كۇشەيتىلسە دە، يرانمەن ديپلوماتيالىق بايلانىس ارنالارى ساقتالاتىنىن اتاپ ءوتتى.
