قىرىمدى تارتىپ العان ءبىز ەمەس، نەگە جازاسىن ءبىز تارتۋعا ءتيىسپىز؟!

3247

ساياساتتانۋشى تالعات قاليەۆ قازاقستان ەۋرازيالىق ەكونوميكالىق وداق اياسىندا ەاەو-نىڭ باتىسقا قارسى جاۋاپ سانكتسيالارىنا قوسىلماۋى كەرەك دەپ سانايدى. بۇل تۋرالى "ادىرنا" ۇلتتىق پورتالى حابارلايدى. 

بۇعان دەيىن رەسەي سىرتقى ىستەر ءمينيسترىنىڭ ورىنباسارى الەكساندر پانكين ەۋرازيالىق ەكونوميكالىق وداقتا باتىس سانكتسيالارىنا جيىنتىق جاۋاپ ازىرلەنىپ جاتىر، بىراق بۇل دسۇ ەرەجەلەرى تۇرعىسىنان زاڭدى بولۋى كەرەك دەپ مالىمدەدى.

قازاقستاندىق ساراپشى ءوزىنىڭ Facebook پاراقشاسىندا "ەاەو باتىس ەلدەرىنە جاۋاپ سانكتسيالارىن قولدانۋى مۇمكىن" دەگەن حابارلاماعا قاتىستى پىكىر ءبىلدىردى.

"ەۋروپالىق اۆياكومپانيانىڭ ۇشاعىن ورتەگەن ءبىز ەمەس، قىرىمدى اننەكسيالامادىق، ءتىپتى ناۆالنىيدى تۇتقىنداعان دا ءبىز ەمەس. وسىلاردىڭ بارلىعى ورىن العاننان سوڭ دا بىزبەن ەشكىم كەڭەسپەدى، بىرىگە شەشىم قابىلداۋعا ەشكىم ۇسىنىس تاستامادى. دەمەك، جيىنتىق جاۋاپقا ءبىزدىڭ قانداي قاتىسىمىز بار؟

جالپى، ءبىز حالىقارالىق قۇقىققا قايشى كەلەتىن ەشنارسە جاساعان جوقپىز. سونىمەن قاتار، ءۇش ونجىلدىقتىڭ ىشىندە قازاقستان ءوزىنىڭ مىندەتتەمەلەرىن قالتقىسىز ورىنداي وتىرىپ، بولجامدى سىرتقى ساياساتى بار بەيبىتشىلىكتى سۇيەتىن مەملەكەت ءيميدجىن ىجداعاتتىلىقپەن قالىپتاستىردى.

بىزگە ەقىۇ-نىڭ توراعالىعى مەن بۇۇ قاۋىپسىزدىك كەڭەسىنىڭ توراعالىعى سەنىپ تاپسىرىلدى، شىنى كەرەك ءبىز جاي قول الىسىپ وتىرعان مەملەكەت ەمەسپىز، قۇرمەتكە يەمىز. قازاقستان ستۋدەنتتەرى الەمنىڭ تۇكپىر-تۇكپىرىندە ءبىلىم الىپ جاتىر، ينۆەستورلاردىڭ كوپشىلىگى بىزگە ۇلكەن سەنىم ارتادى. سونداي-اق ءبىز اقش-تىڭ ەلشىلىگىن قۇم بوشكەلەرىمەن ەمەس، گۇلزارمەن قورشاپ تۇرعان الەمدەگى ساناۋلى ەلدەردىڭ ءبىرى، ءتىپتى بولماسا ءبىرىمىز. بۇل ەلىمىزدىڭ قاۋىپسىزدىك دەڭگەيىنىڭ كورسەتكىشى.

سونىمەن، ءبىز ەاەو-نىڭ قالعان الەمگە قارسى سانكتسيالارىنا نەگە قوسىلۋىمىز كەرەك؟ ءبىز قىرىمدا دەمالىپ جاتىرمىز با، الدە قونعان ۇشاقتارىنان پايداعا كەنەلىپ جاتىرمىز با؟ وسى ۋاقىتقا دەيىن وداققا مۇشە بولۋ ءبىز ءۇشىن جاقسىلىعىنان گورى مينۋسىە كوپ كورسەتتى. ەشكىم بۇل ينتەگراتسيالىق بىرلەستىكتەن يدەولوگيالىق مازمۇن ىزدەمەيدى.

ءبىزدىڭ كەلىسسوز جۇرگىزۋشىلەر سانكتسيالارعا قوسىلماۋ قۇقىعىمىزدى قورعاۋ ءۇشىن جەتكىلىكتى كۇشكە، پرينتسيپتەر مەن دالەلدەرگە سۇيەنەدى دەپ ۇمىتتەنەمىن. جەكە ءوزىم، تەمىر پەردەنىڭ ارتىندا وتىرىپ، وزگەگە ارتىلعان جۇمىستىڭ جاۋاپكەرشىلىگىن العىم كەلمەيدى",-  دەدى تالعات قاليەۆ ءوز جەكە پاراقشاسىندا.

"ادىرنا" ۇلتتىق پورتالى

 

پىكىرلەر
ۇقساس جاڭالىقتار