بۇگىن، 26 قاڭتاردا، استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ەرجان باباقۇماروۆتى ءولتىرۋ ءىسى بويىنشا الدىن الا تىڭداۋ ءوتتى. ايىپتالۋشى ەربول كاۋكەتايعا قر قك 99-بابىنىڭ 1-بولىگى («ادام ءولتىرۋ») بويىنشا 8 جىلدان 15 جىلعا دەيىن باس بوستاندىعىنان ايىرۋ جازاسى قاۋپى ءتونىپ تۇر، دەپ حابارلايدى “ادىرنا” پورتالى كۋرسيۆ سايتىنا سىلتەپ.
سۋديا ايجان كۇلباەۆا الدىن الا تىڭداۋدا جابىرلەنۋشىلەر وكىلدەرى مەن قورعاۋ تاراپىنىڭ ءوتىنىشىن قاناعاتتاندىرىپ، ءىستى جابىق سوت وتىرىسىندا قاراۋ تۋرالى قاۋلى شىعاردى.
«جابىرلەنۋشىلەر وكىلدەرى مەن قورعاۋشىنىڭ ءوتىنىشى قاناعاتتاندىرىلسىن. كاۋكەتايعا قاتىستى قر قىلمىستىق كودەكسىنىڭ 99-بابىنىڭ 1-بولىگى بويىنشا قوزعالعان قىلمىستىق ءىس جابىق سوت وتىرىسىندا قارالسىن. وسى قاۋلى تۇپكىلىكتى بولىپ تابىلادى، شاعىمدانۋعا جانە نارازىلىق كەلتىرۋگە جاتپايدى»، — دەدى سۋديا.
ايجان كۇلباەۆانىڭ ايتۋىنشا، جابىق فورماتتى تاڭداۋ ەڭ الدىمەن مارقۇمنىڭ كامەلەتكە تولماعان بالالارىنىڭ مۇددەسىن قورعاۋ قاجەتتىلىگىمەن بايلانىستى.
«بۇل شەشىم، ەڭ الدىمەن، قازا تاپقان ادامنىڭ كامەلەتكە تولماعان بالالارىنىڭ مۇددەسىن قورعاۋ ماقساتىندا قابىلداندى، ويتكەنى ونىڭ 16 جانە 12 جاستاعى ەكى كامەلەتكە تولماعان بالاسى بار. ادام ومىرىنە قارسى اسا اۋىر قىلمىس تۋرالى ءسوز بولىپ وتىرعانىن ەسكەرە وتىرىپ، قىلمىستىڭ سيپاتى مەن جاسالۋ ءتاسىلىنىڭ بۇقارالىق اقپارات قۇرالدارىندا اشىق جاريالانۋى قوعامدىق تالقىلاۋعا اكەلۋى مۇمكىن»، – دەپ ءتۇسىندىردى ول.
ەرجان باباقۇماروۆ 1969 جىلى تۋعان. ءال-فارابي اتىنداعى قازاق مەملەكەتتىك ۋنيۆەرسيتەتىن تامامداعان. ساياساتتانۋ عىلىمدارىنىڭ كانديداتى، قوعامدىق ساياسي عىلىمدار اكادەمياسىنىڭ اكادەميگى، قازاقستان ساياسي عىلىمدار قاۋىمداستىعىنىڭ مۇشەسى.
ءار جىلدارى قازاقستاندى دامىتۋ ينستيتۋتىنىڭ ساياسي زەرتتەۋلەر ورتالىعىن، پرەزيدەنت اكىمشىلىگىنىڭ اقپاراتتىق-تالداۋ ورتالىعىن، پرەزيدەنت جانىنداعى ورتالىق كوممۋنيكاتسيالار قىزمەتىن باسقارعان. سونىمەن قاتار مادەنيەت جانە اقپارات ۆيتسە-ءمينيسترى، مادەنيەت جانە اقپارات مينيسترلىگىنىڭ جاۋاپتى حاتشىسى، قر پرەمەر-ءمينيسترى كەڭسەسى باسشىسىنىڭ ورىنباسارى قىزمەتتەرىن اتقارعان.
2018 جىلدىڭ جەلتوقسانىنان باستاپ قازاقستان رەسپۋبليكاسى پرەزيدەنتى اكىمشىلىگىنىڭ تالداۋ جانە بولجاۋ ورتالىعىنىڭ مەڭگەرۋشىسى بولىپ جۇمىس ىستەدى. 2019 جىلى پرەزيدەنتتىڭ كەڭەسشىسى – پرەزيدەنت اكىمشىلىگىنىڭ تالداۋ جانە بولجاۋ ورتالىعىنىڭ مەڭگەرۋشىسى قىزمەتىن اتقاردى.
بۇعان دەيىن ەرجان باباقۇماروۆتىڭ استانادا توبەلەس كەزىندە قازا تاپقانىن حابارلاندى. بۇل اقپاراتتى ەلوردالىق پوليتسيا دەپارتامەنتى دە راستادى.
ادام ءولتىرۋ دەرەگى بويىنشا قىلمىستىق ءىس قوزعالدى. كۇدىكتى ۇستالىپ، ۋاقىتشا ۇستاۋ يزولياتورىنا قامالدى. بارلىق تەرگەۋ ارەكەتتەرى اياقتالعاننان كەيىن ءىس سوتقا جولداندى.
