Bügın, 26 qaŋtarda, Astananyŋ qylmystyq ıster jönındegı mamandandyrylǧan audanaralyq sotynda Erjan Babaqūmarovty öltıru ısı boiynşa aldyn ala tyŋdau öttı. Aiyptaluşy Erbol Kauketaiǧa QR QK 99-babynyŋ 1-bölıgı («Adam öltıru») boiynşa 8 jyldan 15 jylǧa deiın bas bostandyǧynan aiyru jazasy qaupı tönıp tūr, dep habarlaidy “Adyrna” portaly Kursiv saityna sıltep.
Sudia Aijan Külbaeva aldyn ala tyŋdauda jäbırlenuşıler ökılderı men qorǧau tarapynyŋ ötınışın qanaǧattandyryp, ıstı jabyq sot otyrysynda qarau turaly qauly şyǧardy.
«Jäbırlenuşıler ökılderı men qorǧauşynyŋ ötınışı qanaǧattandyrylsyn. Kauketaiǧa qatysty QR Qylmystyq kodeksınıŋ 99-babynyŋ 1-bölıgı boiynşa qozǧalǧan qylmystyq ıs jabyq sot otyrysynda qaralsyn. Osy qauly tüpkılıktı bolyp tabylady, şaǧymdanuǧa jäne narazylyq keltıruge jatpaidy», — dedı sudia.
Aijan Külbaevanyŋ aituynşa, jabyq formatty taŋdau eŋ aldymen marqūmnyŋ kämeletke tolmaǧan balalarynyŋ müddesın qorǧau qajettılıgımen bailanysty.
«Būl şeşım, eŋ aldymen, qaza tapqan adamnyŋ kämeletke tolmaǧan balalarynyŋ müddesın qorǧau maqsatynda qabyldandy, öitkenı onyŋ 16 jäne 12 jastaǧy ekı kämeletke tolmaǧan balasy bar. Adam ömırıne qarsy asa auyr qylmys turaly söz bolyp otyrǧanyn eskere otyryp, qylmystyŋ sipaty men jasalu täsılınıŋ būqaralyq aqparat qūraldarynda aşyq jariialanuy qoǧamdyq talqylauǧa äkeluı mümkın», – dep tüsındırdı ol.
Erjan Babaqūmarov 1969 jyly tuǧan. Äl-Farabi atyndaǧy Qazaq memlekettık universitetın tämamdaǧan. Saiasattanu ǧylymdarynyŋ kandidaty, Qoǧamdyq saiasi ǧylymdar akademiiasynyŋ akademigı, Qazaqstan saiasi ǧylymdar qauymdastyǧynyŋ müşesı.
Är jyldary Qazaqstandy damytu institutynyŋ Saiasi zertteuler ortalyǧyn, Prezident äkımşılıgınıŋ Aqparattyq-taldau ortalyǧyn, Prezident janyndaǧy Ortalyq kommunikasiialar qyzmetın basqarǧan. Sonymen qatar mädeniet jäne aqparat vise-ministrı, mädeniet jäne aqparat ministrlıgınıŋ jauapty hatşysy, QR Premer-Ministrı keŋsesı basşysynyŋ orynbasary qyzmetterın atqarǧan.
2018 jyldyŋ jeltoqsanynan bastap Qazaqstan Respublikasy Prezidentı äkımşılıgınıŋ Taldau jäne boljau ortalyǧynyŋ meŋgeruşısı bolyp jūmys ıstedı. 2019 jyly Prezidenttıŋ keŋesşısı – Prezident äkımşılıgınıŋ Taldau jäne boljau ortalyǧynyŋ meŋgeruşısı qyzmetın atqardy.
Būǧan deiın Erjan Babaqūmarovtyŋ Astanada töbeles kezınde qaza tapqanyn habarlandy. Būl aqparatty elordalyq polisiia departamentı de rastady.
Adam öltıru deregı boiynşa qylmystyq ıs qozǧaldy. Küdıktı ūstalyp, uaqytşa ūstau izoliatoryna qamaldy. Barlyq tergeu äreketterı aiaqtalǧannan keiın ıs sotqa joldandy.
