قر پارلامەنتى سەناتى توراعاسىنىڭ ورىنباسارى جاقىپ اسانوۆ كونستيتۋتسيالىق رەفورما جونىندەگى كوميسسيانىڭ العاشقى وتىرىسىندا جەكە دەرەكتەردى قورعاۋ ماسەلەسىنىڭ وزەكتىلىگىنە نازار اۋداردى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، تسيفرلىق داۋىردە ازاماتتاردىڭ قۇقىعى تەك قاعاز جۇزىندە ەمەس، ناقتى ءارى ءتيىمدى تۇردە قورعالۋى ءتيىس. سوڭعى جىلدارى كوشەدەگى قىلمىس ايتارلىقتاي ازايعانىمەن، الاياقتىق پەن توناۋ تسيفرلىق كەڭىستىككە كوشكەن.
مىسال رەتىندە اسانوۆ اقمولا وبلىسىندا اشكەرەلەنگەن قىلمىستىق توپتى اتادى. ۇيىمداسقان توپ 348 ازاماتتىڭ جەكە دەرەكتەرىن زاڭسىز يەمدەنىپ، ولاردىڭ اتىنان شامامەن 4 ميلليارد تەڭگە كولەمىندە نەسيە راسىمدەگەن. ناتيجەسىندە ادامدار بانككە بارماي-اق، قۇجاتقا قول قويماي-اق، كۇتپەگەن جەردەن قارىزعا باتقان.
سەنات توراعاسىنىڭ ورىنباسارى سمارتفون مەن ينتەرنەتكە تاۋەلدى قازىرگى ومىردە ازاماتتاردىڭ جەكە دەرەكتەرى الاياقتاردىڭ وڭاي ولجاسىنا اينالىپ وتىرعانىن ايتتى. ونىڭ پىكىرىنشە، كونستيتۋتسيادا بەكىتىلگەن جەكە ومىرگە قول سۇقپاۋشىلىق قاعيداتى تسيفرلىق كەڭىستىكتە دە تولىق قامتاماسىز ەتىلۋى قاجەت.
«ادام كوشەدە دە، ۇيدە دە ءوزىن قورعالعان سەزىنەدى. بىراق ينتەرنەت پەن سمارتفون كەڭىستىگىندە مۇنداي سەنىم جوق. جەكە دەرەكتەر قولدان قولعا ءوتىپ، ازاماتتار كۇن سايىن الاياقتاردىڭ قۇربانىنا اينالۋدا. ءار ادام قايدا جۇرسە دە — شىنايى ومىردە بولسىن، تسيفرلىق ورتادا بولسىن — ءوزىنىڭ قورعالعانىن سەزىنۋى ءتيىس. بۇل مەملەكەتتىڭ تىكەلەي مىندەتى»، – دەدى جاقىپ اسانوۆ.
ول ءسوز سوڭىندا كونستيتۋتسيالىق رەفورما اياسىندا جەكە دەرەكتەردى قورعاۋ ماسەلەسىن ارنايى قاراستىرۋ قاجەت ەكەنىن اتاپ ءوتتى.
