ايماق باسشىسى ناريمان تورەعاليەۆ وڭىردەگى ىرگەلى كاسىپورىن جەتەكشىلەرىمەن كەزدەستى. جينالعاندار جاڭا كونستيتۋتسيا جوباسىنا قولداۋ ءبىلدىردى. وبلىس اكىمى اتا زاڭنىڭ جاڭا نۇسقاسىندا جۇرتشىلىقتىڭ ۇسىنىس-پىكىرى ەسكەرىلگەنىن اتاپ ءوتتى.
"مەملەكەت باسشىسى باستاماشى بولعان كونستيتۋتسيالىق رەفورما كەيىنگى جىلدارى دايەكتى تۇردە جۇزەگە اسىرىلعان ساياسي وزگەرىستەردىڭ جالعاسى. باستى قۇجاتتىڭ جوباسىن تالقىلاۋ – زاڭگەرلەر مەن مامانداردىڭ عانا ەمەس، جالپى قوعامنىڭ مىندەتى. ويتكەنى، مۇنداعى نورمالار مەن قاعيداتتار كەلەر ۇرپاقتىڭ تاعدىرىنا تىكەلەي اسەر ەتەدى", - دەدى ايماق باسشىسى.
وبلىستىق ءماسليحات توراعاسى، «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» وبلىستىق كواليتسياسىنىڭ توراعاسى مۇرات مۇقاەۆ ءوزى قۇرامىندا بولعان كونستيتۋتسيالىق كوميسسيا اۋقىمدى جۇمىس اتقارعانىن، باستى قۇجاتتىڭ جوباسى بارلىق جاعىنان جان-جاقتى سارالانعانىن ايتتى.
وبلىس اكىمىنىڭ ورىنباسارى قايىرجان مەڭدىعاليەۆ جاڭا كونستيتۋتسيا جوباسى مەملەكەت پەن بيزنەس اراسىنداعى سەنىمدى كۇشەيتىپ، ۇزاقمەرزىمدى ارىپتەستىككە نەگىز بولاتىن ورتا قالىپتاستىرۋعا باعىتتالعانىن ايتتى. ول جەرگىلىكتى بيزنەس قاۋىمداستىعى بۇل جولى دا بەلسەندىلىك تانىتاتىنىنا سەنىم ءبىلدىردى.
«كپو ب.ۆ.» كومپانياسى باس ديرەكتورىنىڭ ورىنباسارى مۇحتار مانكەەۆ كونستيتۋتسيالىق رەفورما كاسىپكەرلىكتى قولداۋدىڭ، ينۆەستيتسيالىق كليماتتى جاقسارتۋدىڭ نەگىزگى قۇقىقتىق كەپىلى ەكەنىن ايتىپ، ىرگەلى ەڭبەك ۇجىمى جاڭا اتا زاڭ جوباسىن قولدايتىنىن جەتكىزدى.
«جايىق ەت» كومپانياسىنىڭ قۇرىلتايشىسى تەمىرعالي ەسكەندىروۆ، «پسپ سەريك» جشس باس ديرەكتورى سەرىك مەرعاليەۆ جاڭا قۇجات بيزنەس يەلەرىنە زور جاۋاپكەرشىلىك جۇكتەيتىنىن جەتكىزدى. ولاردىڭ ويىنشا ەڭبەككە ادالدىق، كاسىپكە قۇرمەت، ەلگە جاناشىرلىق سياقتى قۇندىلىقتاردىڭ ماڭىزى ودان ءارى ارتا تۇسەدى.
كەزدەسۋدە وڭىردەگى ستراتەگيالىق ماڭىزدى كوممۋنالدىق كاسىپورىن جەتەكشىلەرى، «كۆانت»، «ورالاگرورەمماش»، «ورال زەنيت زاۋىتى»، «ورال ترانسفورماتور زاۋىتى»، «جايىقمۇناي»، «كۋبلەي»، «پويما ماي كومبيناتى» جانە وزگە دە ءىرى كومپانيا باسشىلارى بولدى. جاڭا كونستيتۋتسيا ءادىل باسەكەلەستىككە جول اشاتىنىنا، قۇقىقتىق تۇراقتىلىققا كەپىل بولاتىنىنا سەنىم بىلدىرگەن بيزنەس وكىلدەرى ماڭىزدى رەفورمانى قولدايتىنىن جەتكىزدى.
