قاراعاندى تۇرعىنى حقكو-عا بارعاننان كەيىن ءوزىنىڭ "قايتىس بولعان" دەگەن ەسەپتە تۇرعانىن بىلگەن. بۇل تۋرالى پوليتسيا دەپارتامەنتى مالىمدەدى، دەپ حابارلايدى “ادىرنا” ۇلتتىق پورتالى.
38 جاستاعى نادەجدا ليپينا بيىل 23 مامىردا جەكە كۋالىگىن اۋىستىرۋ ءۇشىن حالىققا قىزمەت كورسەتۋ ورتالىعىنا جۇگىنگەن. ويتكەنى قۇجاتىنىڭ مەرزىمى اياقتالعان. كەيىن 2012 جىلدان باستاپ مالىمەتتەر بازاسىندا ايەل "قايتىس بولدى" دەگەن ەسەپتە تۇرعانى بەلگىلى بولعان.
"شوشىپ كەتتىم. وسى جىلدار ىشىندە رەسمي جۇمىس ىستەدىم. نەسيە الدىم، 2018 جىلى بوساندىم، ءبىر جاسقا دەيىنگى بالا كۇتىمى بويىنشا جاردەماقى الدىم. ماعان احاج تىركەۋ كىتابىندا مەنىڭ ء"ولىمىم" تۋرالى جازبا بارى ايتىلدى. بۇل قالاي بولۋى مۇمكىن؟ تۇسىنبەيمىن", - دەدى نادەجدا ليپينا.حقكو وكىلى ايەلگە جاعدايدى تۇزەتۋگە ۋادە بەرگەن.
"23 مامىردان باستاپ ولاردان جاۋاپ كۇتتىم. بۇگىن ولار ماعان قوڭىراۋ شالىپ، قاتە وزگەرتىلگەنىن، جەكە كۋالىكتى اۋىستىرۋعا بارا الاتىنىمدى ايتتى. دۇيسەنبىدە بارامىن، ويتكەنى بۇگىن جۇمىستامىن", - دەدى نادەجدا ليپينا.قاراعاندى وبلىسى پد ءباسپاسوز قىزمەتى وكىلى بولعان جاعدايعا قاتىستى پىكىر ءبىلدىردى.
"ازاماتشا ليپينا جۇگىنگەن كەزدە، بۇرىن بەرىلگەن كۋالىك 2012 جىلى "ازاماتتىڭ قايتىس بولۋىنا بايلانىستى" دەگەن قاتە سەبەپپەن جويىلعانى انىقتالدى. 9 ماۋسىمداعى جاعداي بويىنشا، دەرەكتەر بازاسىنا تۇزەتۋ ەنگىزىلدى، - دەپ ءتۇسىندىردى پد ءباسپاسوز قىزمەتى وكىلى.سونداي-اق، ۆەدومستۆو وكىلى ايەل مەرزىمى وتكەن قۇجات ءۇشىن ايىپپۇل تولەمەيتىنىن اتاپ ءوتتى.
”ادىرنا” ۇلتتىق پورتالى
ۇقساس جاڭالىقتار
