دەليدە Indigo Airlines اۋە كومپانياسىنىڭ الماتى – دەلي باعىتى بويىنشا ۇشقان رەيسىندە زاڭسىز التىن تاسىمالداعان ءۇش جولاۋشى ۇستالدى، دەپ حابارلايدى "ادىرنا" ۇلتتىق پورتالى News Hindi-گە سىلتەمە جاساپ.
وقيعا 5 جەلتوقساندا بولعان. الماتىدان ۇشىپ شىققان جولاۋشىلار ءتورت ساعاتقا جۋىق ۇشۋ كەزىندە تاماقتان باس تارتىپ، ەرەكشە مىنەز-قۇلىق تانىتقان.
جولاۋشىلاردىڭ ارەكەتىنەن كۇدىكتەنگەن بورتسەرىك بۇل تۋرالى ۇشاق كاپيتانىنا ايتىپ، اۋە قوزعالىسىن باسقارۋ ورتالىعى ارقىلى كەدەن قىزمەتكەرلەرىمەن بايلانىسقا شىققان.
ۇشاق اۋەجايعا قونعانناندا دەليدەگى كەدەن قىزمەتكەرلەرى ءۇش جولاۋشىنى ۇستاۋعا دايىن بولعان. جاسىل دالىزدەن وتكەندە ەر ادامداردى توقتاتىپ، تەرگەۋگە العان. ولاردىڭ جۇكتەرى رەنتگەن قۇرىلعىسىمەن تەكسەرىلگەن. باستاپقى تەكسەرىس بارىسىندا ەشتەڭە تابىلماعان. سونداي-اق مەتالل دەتەكتورىمەن تەكسەرۋ دە ناتيجە بەرمەگەن.
"ناتيجە بولماعانىنا قاراماستان، كەدەن قىزمەتكەرلەرى ءۇش جولاۋشىنى جەكە بولمەگە الىپ بارىپ، تەرگەدى. تەرگەۋ بارىسىندا ۇشەۋى دە التىن كەسەكتەرىن تىك ىشەكتە جاسىرعاندارىن مويىندادى", – دەلىنگەن حابارلامادا.
وسىدان كەيىنگى تەكسەرىس كەزىندە جالپى سالماعى شامامەن 439 گرامم بولاتىن سەگىز التىن كەسەگى تابىلعان. ءۇش جولاۋشىنىڭ بارلىعى قاماۋعا الىندى.
ماتەريالدا ەر ادامداردىڭ ازاماتتىعى تۋرالى ناقتى اقپارات بەرىلمەگەن.
ۇقساس جاڭالىقتار
