قاراعاندى وبلىسىنداعى ءىرى ونەركاسىپ كاسىپورىندارىنىڭ ۇجىمدارى قازاقستان رەسپۋبليكاسىنىڭ جاڭا كونستيتۋتسياسى جوباسىن قولدادى. مەتاللۋرگيا، كومىر سالاسى جانە قايتا وڭدەۋ وندىرىستەرىنىڭ قىزمەتكەرلەرى ۇسىنىلىپ وتىرعان وزگەرىستەردىڭ ەڭبەك ادامىنىڭ قۇقىقتارىن قورعاۋ مەن ەكونوميكانىڭ ورنىقتى دامۋى ءۇشىن ماڭىزىن اتاپ وتۋدە.
Qarmet كومپانياسىنىڭ وتىز بەس مىڭدىق ۇجىمى نەگىزگى زاڭدى جاڭارتۋ ادامدار ءۇشىن تۇسىنىكتى ءارى ماڭىزدى قاعيداتتاردى — ادامنىڭ باسىمدىعىن، ونىڭ قادىر-قاسيەتىنە قۇرمەتتى، ەڭبەك ەتۋ قۇقىعىن جانە كاسىبي ءوسۋ مۇمكىندىكتەرىن — بەكىتەدى دەپ سانايدى. كاسىپورىندا ايقىن ءارى تەڭ قاعيدالاردىڭ تەك ازاماتتار ءۇشىن عانا ەمەس، ونەركاسىپتىڭ تۇراقتى جۇمىس ىستەۋى ءۇشىن دە ماڭىزدى ەكەنى ايتىلدى.
— جاڭا كونستيتۋتسيا — ەل بولاشاعىنىڭ بەرىك ىرگەتاسى. ونىڭ نەگىزىندە ادىلەتتىلىك، زاڭدىلىق جانە ادامعا قۇرمەت قاعيداتتارى جاتىر. ەڭبەك ادامدارى ءۇشىن مەملەكەت بارشاعا تۇسىنىكتى ءارى تەڭ ەرەجەلەردى قامتاماسىز ەتىپ، ازاماتتاردىڭ قۇقىقتارىن قورعاپ، دامۋ ءۇشىن جاعداي جاساۋى اسا ماڭىزدى. ءدال وسىنداي قاعيداتتار نەگىزىندە قۋاتتى، ورنىقتى جانە ادىلەتتى مەملەكەت قۇرىلادى، — دەدى ديرەكتورلار كەڭەسىنىڭ توراعاسى اندرەي لاۆرەنتەۆ.
جوبانى «شۇباركول كومىر» اق قىزمەتكەرلەرى دە قولدادى. ەلدەگى ەنەرگەتيكالىق كومىردىڭ ءىرى وندىرۋشىلەرى سانالاتىن بۇل ۇجىمدا قۇجاتتا ادامنىڭ ءومىرى، قادىر-قاسيەتى جانە ەڭبەگىن قورعاۋ باسىمدىعىنىڭ بەكىتىلۋى ونەركاسىپ سەكتورى قىزمەتكەرلەرى ءۇشىن قاعيداتتى مانگە يە ەكەنى اتاپ ءوتىلدى.
— بۇگىن ەل جاڭا كونستيتۋتسيانى قابىلداۋ جونىندە ماڭىزدى شەشىم الدىندا تۇر. ەڭبەك ۇجىمى ءۇشىن بۇل جاي عانا زاڭدىق قۇجات ەمەس — بۇل ءومىر مەن دامۋدىڭ، قۇقىقتار مەن بوستاندىقتاردىڭ كەپىلى. كونستيتۋتسيادا ادام، ونىڭ ءومىرى مەن قادىر-قاسيەتى مەملەكەتتىڭ ەڭ جوعارى قۇندىلىعى ەكەنى بەكىتىلگەن. بۇل ەڭبەكتىڭ قاۋىپسىزدىگى — فورمالدىلىق ەمەس، مىندەت ەكەنىن; قىزمەتكەر قۇقىعىن قورعاۋ — ءوتىنىش ەمەس، زاڭ ەكەنىن بىلدىرەدى، — دەدى ERG كومىر ديۆيزيونىنىڭ باس وپەراتسيالىق ديرەكتورى، شۇباركول كومىر اق وكىلى سەرگەي كيم.
قاراعاندى فەرروقورىتپا زاۋىتى Asia FerroAlloys اكتسيونەرلەرى مەن ۇجىمى دا ءوز ۇستانىمدارىن ءبىلدىردى. كاسىپورىندا ونەركاسىپ سەكتورى ءۇشىن الەۋمەتتىك تۇراقتىلىق پەن قاۋىپسىز ەڭبەك جاعدايلارىنا قاتىستى نورمالاردىڭ ايرىقشا ماڭىزدى ەكەنى اتاپ ءوتىلدى. ولاردىڭ پىكىرىنشە، نەگىزگى زاڭدى جاڭارتۋ ەڭبەك ادامىنا ارنالعان كەپىلدىكتەر جۇيەسىن اناعۇرلىم تۇسىنىكتى ءارى ناقتى ەتەدى.
جاڭا كونستيتۋتسيا جوباسىن قولدايتىنىن MAKER KLMZ جشس قىزمەتكەرلەرى دە مالىمدەدى.
— بۇگىن ءاربىر ازاماتتىڭ بەلسەندى ازاماتتىق ۇستانىم تانىتۋى ماڭىزدى. رەفەرەندۋم — ەل بولاشاعىنا ءوز ۇلەسىن قوسۋعا، تۇراقتىلىق پەن پروگرەستى قولداۋعا مۇمكىندىك، — دەپ سانايدى كاسىپورىن ۇجىمى.
ونەركاسىپ سەكتورىنىڭ قىزمەتكەرلەرى رەفەرەندۋمعا قاتىساتىنىن اتاپ ءوتتى، ويتكەنى بۇل — ولاردىڭ ازاماتتىق پارىزى ءارى ەل بولاشاعىنا ىقپال ەتۋ مۇمكىندىگى.
