الماتى كوشەلەرىنەن قازاقستاننىڭ تجم بەلگىسى بار Tesla Cybertruck ەلەكتروكارى بايقالعان. كولىكتىڭ مەملەكەتتىك ساتىپ الۋ پورتالى ارقىلى رەسمي تۇردە الىنعانى بەلگىلى بولدى، دەپ حابارلايدى “ادىرنا” ۇلتتىق پورتالى.
قۇجاتتارعا سايكەس، الماتى قالالىق توتەنشە جاعدايلار دەپارتامەنتى توو Zharyq كومپانياسىنان «وپەراتيۆتى-جولاۋشى اۆتوكولىگىن» ساتىپ العان. كەلىسىمشارتتىڭ جالپى قۇنى شامامەن 127,5 ميلليون تەڭگەنى قۇرايدى. بۇل باعا kolesa سايتىندا كورسەتىلگەن كولىكتەردىڭ باعاسىنان قىمبات. كولىكتىڭ بازارداعى باعاسى كورسەتىلگەن وسى رەسۋرستىڭ مالىمەتىنشە، اتالعان كولىكتىڭ جاڭادان شىققان ارنايى BEAST CYBERBEAST نۇسقاسىنىڭ ءوزى 125 ملن تەڭگەدەن قىمبات ەمەس. بۇل نۇسقانىڭ كولىكتىڭ وسى ءتۇرىنىڭ باسقا تۇرىنەن ايىرماشىلىعى ءۇش موتورمەن جابدىقتالعان. تجد ساتىپ العان كولىكتىڭ قانداي نۇسقا ەكەنى، قانداي ارتىقشىلىققا يە ەكەندىگى ناقتى ايتىلماي، جالپىلاما عانا سيپاتتاما بەرىلگەن.
كەلىسىمشارتقا تىركەلگەن تەحنيكالىق سيپاتتامادا اتالعان ەلەكتروموبيلدىڭ بىرنەشە ماقساتتا پايدالانىلاتىنى كورسەتىلگەن. اتاپ ايتقاندا، Tesla Cybertruck باسشىلىق پەن مامانداردى وقيعا ورنىنا جەدەل جەتكىزۋگە، جاعدايدى باستاپقى باعالاۋعا، ونىڭ ىشىندە قولجەتىمدىلىگى قيىن ايماقتاردا، قۇتقارۋشىلار، ءورت سوندىرۋشىلەر مەن مەديتسينا قىزمەتكەرلەرىنىڭ جۇمىسىن ۇيلەستىرۋگە، 1000 كەلىگە دەيىنگى جابدىق پەن شاعىن جۇكتەردى تاسىمالداۋعا، كۇردەلى ءارى قولجەتىمسىز اۋماقتاردا پاترۋل جۇرگىزىپ، جەدەل ارەكەت ەتۋگە ارنالعان.
قۇجاتتا كولىكتىڭ تولىق جەتەكتى جۇيەسى، ەلەكتر قوزعالتقىشتارىنىڭ جىلدام جاۋاپ بەرۋ مۇمكىندىگى مەن بەيىمدەلەتىن اسپاسىنىڭ ارقاسىندا جوعارى وتىمدىلىك پەن ديناميكاعا يە ەكەنى اتاپ وتىلگەن. سونداي-اق، توت باسپايتىن بولاتتان جاسالعان بەرىك، سوققىعا ءتوزىمدى اينەكتەر قىزمەتكەرلەردىڭ قاۋىپسىزدىگىن قامتاماسىز ەتەتىنى كورسەتىلگەن.
ايتا كەتەيىك، تجم كولىكتى نەگىزىنەن الماتىنىڭ تاۋلى ايماقتارىندا جانە وعان ىرگەلەس جەرلەردە پايدالانۋ جوسپارلانىپ وتىرعانىن ايتقان ەدى.
