7 ءساۋىر كۇنى Tesla كومپانياسىنىڭ اكتسيالارى الدىن الا ساۋدادا 214 دوللارعا دەيىن تومەندەدى، دەپ حابارلايدى “ادىرنا” ۇلتتىق پورتالى Oxu.Az-عا سىلتەپ.
Bloomberg پەن Oxu.Az حابارلاۋىنشا، مۇنداي قۇلدىراۋعا كومپانيانىڭ ىشكى ماسەلەلەرىنەن بولەك، اقش پرەزيدەنتى دونالد ترامپتىڭ جاريالاعان ساۋدا سوعىسى سەبەپ بولعان. يمپورتقا سالىنعان جاپپاي كەدەندىك سالىقتار ينۆەستورلار اراسىندا ۇلكەن الاڭداۋشىلىق تۋدىرىپ، قور نارىعى كۇن سايىن بىرنەشە پايىزعا تومەندەپ جاتىر.
بۇعان دەيىن، ترامپتىڭ سايلاۋداعى جەڭىسىنەن كەيىن Tesla اكتسيالارى شارىقتاۋ شەگىنە جەتكەن ەدى. سەبەبى يلون ماسك رەسپۋبليكالىق پرەزيدەنتتىڭ جاقىن وداقتاسىنا اينالىپ، مەملەكەتتىك باسقارۋدى ءتيىمدى ەتۋ جوبالارىنا قاتىسا باستادى. بىراق ترامپتىڭ العاشقى قادامدارى مەن Tesla-نىڭ ءالسىز ساتىلىم كورسەتكىشتەرى اكتسيالاردىڭ قۇلدىراۋىنا اكەلدى.
جەلتوقسانداعى ەڭ جوعارى كورسەتكىشپەن سالىستىرعاندا اكتسيالار 1,5 ەسە ارزاندادى. بۇعان ماسكتىڭ ساياسي بەلسەندىلىگىنە قارسى نارازىلىقتار مەن كومپانيا ءيميدجىنىڭ ناشارلاۋى اسەر ەتكەن.
ماسك العاش رەت ترامپتىڭ باعىتىنا قارسى شىعىپ، ەو مەن اقش اراسىنداعى يمپورتتىق باج سالىعىن الىپ تاستاۋ كەرەك ەكەنىن ايتتى. ال ترامپ ءوز كەزەگىندە ەۋروپانى اقش-تان جۇزدەگەن ميلليارد ەۋرو ۇرلادى دەپ ايىپتاپ، ونى قايتارۋدى تالاپ ەتتى.
ايتا كەتەيىك، يلون ماسكتىڭ امەريكا ساياساتىنا بەلسەندى ارالاسۋى Tesla كومپانياسىنا ۇلكەن قيىندىقتار تۋدىرعانى تۋرالى حابارلاعان ەدىك.
