اقش-تىڭ ءتورت دەموكرات-سەناتورى اق ۇيدە وتكەن شاراعا بايلانىستى تەرگەۋ جۇرگىزۋدى تالاپ ەتتى. بۇل شارادا ەل پرەزيدەنتى دونالد ترامپ پەن امەريكالىق كاسىپكەر يلون ماسك Tesla كولىكتەرىنىڭ جانىندا ءباسپاسوز وكىلدەرىنە سۇحبات بەرگەن ەدى، دەپ حابارلايدى “ادىرنا” ۇلتتىق پورتالى.
سەناتورلار ەليزابەت ۋوررەن، ادام شيفف، كوري بۋكەر جانە ريچارد بليۋمەنتال اقش-تىڭ ۇكىمەتتىك ەتيكا باسقارماسىنىڭ (OGE) ۋاقىتشا ديرەكتورى دۋگلاس كوللينزگە حات جولداپ، مەملەكەتتىك ورىننىڭ جەكە كومپانيانى جارنامالاۋ ءۇشىن قولدانىلعانىنا الاڭداۋشىلىق ءبىلدىردى.
ولاردىڭ پىكىرىنشە، ماسك ءوز بايلانىستارىن پايدالانىپ، Tesla كولىگىنىڭ جارناماسىن جاسادى. ولار بۇل وقيعانىڭ ەگجەي-تەگجەيىن تەكسەرۋدى تالاپ ەتتى.
«ماسك اق ءۇي اۋلاسىندا پرەزيدەنتپەن بىرگە رەسمي ءباسپاسوز كونفەرەنتسياسىنا قاتىسىپ، Tesla-نى ناسيحاتتادى. بۇل ونىڭ ءوز كوممەرتسيالىق مۇددەلەرى ءۇشىن بايلانىستارىن قولداناتىنىن كورسەتەدى جانە ترامپ اكىمشىلىگىنىڭ كومپانيانى قولدايتىنى تۋرالى اسەر قالدىرادى»، – دەلىنگەن حاتتا.
12 ناۋرىزدا وتكەن ءىس-شارا بارىسىندا پرەزيدەنت ترامپ Tesla كولىكتەرىنىڭ ءبىرىن ساتىپ الۋعا ۋادە بەردى.
«مەن ونى ساتىپ الامىن، ويتكەنى بۇل – كەرەمەت ءونىم. سونىمەن قاتار، بۇل ادام (ماسك) ءومىرىن وسى ىسكە ارنادى جانە وعان ادىلەتسىزدىك جاسالدى دەپ ويلايمىن»، – دەدى ترامپ.
