قازنەتتە توتەنشە جاعدايلار مينيسترلىگىنىڭ بەلگىسى بار Tesla Cybertruck كولىگىنىڭ ەۆاكۋاتورعا تيەلىپ بارا جاتقان ۆيدەوعا تارادى. مينيسترلىك بۇل جاعدايعا پىكىر ءبىلدىردى، دەپ حابارلايدى «ادىرنا» ءتىلشىسى.
بۇعان دەيىن جەلى قولدانۋشىلارى مۇنداي قىمبات اۆتوكولىكتىڭ مينيسترلىككە نە سەبەپتى كەرەك بولعانىن بىلە الماي الەك بولعان ەدى. تجم Tengrinews.kz پورتالىنا بەرگەن جاۋابىندا ماتەريالدىق-تەحنيكالىق بازانى كەزەڭ-كەزەڭىمەن جاڭارتىپ جاتقانىن مالىمدەدى.
«ماتەريالدىق-تەحنيكالىق قامتاماسىز ەتۋ اياسىندا تجم بولىمشەلەرى ءۇشىن زاماناۋي قۇتقارۋ تەحنيكاسى مەن قۇرال-جابدىقتاردى ەنگىزۋ بويىنشا جوسپارلى جۇمىس جۇرگىزىلۋدە»،-دەلىنگەن حابارلامادا.
كولىكتى نەگىزىنەن الماتىنىڭ تاۋلى ايماقتارىندا جانە وعان ىرگەلەس جەرلەردە پايدالانۋ جوسپارلانىپ وتىر، ويتكەنى ءدال وسى جەردە شاقىرۋلار سانى ەڭ كوپ تىركەلەدى.
«بۇل تىكەلەي قۇتقارۋ قىزمەتىنىڭ دايىندىق دەڭگەيى مەن جەدەل ارەكەت ەتۋ جىلدامدىعىنا اسەر ەتەدى»،-دەپ اتاپ ءوتتى مينيسترلىك.
تجم مالىمەتىنشە، Tesla Cybertruck كەلەسى مىندەتتەردە قولدانىلۋى مۇمكىن:
• قۇتقارۋ بولىمشەلەرىن جەدەل جەتكىزۋ;
• تابيعي جانە تەحنوگەندىك توتەنشە جاعدايلارعا ارەكەت ەتۋ;
• اۆاريالىق-قۇتقارۋ جۇمىستارىن جۇرگىزۋ;
• زارداپ شەككەندەردى، سونىڭ ىشىندە شۇعىل مەديتسينالىق كومەك قاجەت تۋريستەردى ەۆاكۋاتسيالاۋ.
سونداي-اق مينيسترلىك الماتىنىڭ تاۋلى ايماقتارى قۇتقارۋشىلار ءۇشىن جۇكتەمەسى جوعارى ايماق بولىپ قالا بەرەتىنىن ايتتى.
ايتا كەتەيىك، Tesla Cybertruck – تولىقتاي ەلەكتر قۋاتىمەن جۇرەتىن، جول تالعامايتىن كولىك. ول جوعارى كورپۋسىمەن، جۇك كوتەرگىشتىگىمەن جانە ەكسترەمالدى جاعدايلارعا توزىمدىلىگىمەن ەرەكشەلەنەدى. Tesla كومپانياسىنىڭ رەسمي سايتىندا مودەلدىڭ باعاسى كونفيگۋراتسياسىنا بايلانىستى وسەتىنى ايتىلعان. قازىرگى تاڭدا Kolesa.kz سايتىندا 2025 جىلى شىققان تولىق جيناقتاعى مودەلدىڭ باعاسى 120 ملن تەڭگە دەپ كورسەتىلگەن.
