اۋىل شارۋاشىلىعى ءمينيسترى ايداربەك ساپاروۆتىڭ تاپسىرماسىنا سايكەس، 2025–2028 جىلدارعا ارنالعان «اپورت» الماسىنىڭ سورتىن قايتا جاڭعىرتۋ جونىندەگى جول كارتاسىنىڭ جۇزەگە اسىرىلۋىنا مونيتورينگ جۇرگىزىلدى.
بۇل باعىتتاعى جۇيەلى جۇمىس مەملەكەت باسشىسىنىڭ تاپسىرماسىنا سايكەس 2024 جىلى باستالدى جانە ەلىمىزدىڭ بىرەگەي مادەني مۇراسى ءارى سيمۆولى سانالاتىن «اپورت» الماسىنىڭ سورتىن قالپىنا كەلتىرۋگە باعىتتالعان.
پرەزيدەنت ءىس باسقارماسىنا قاراستى «استانا 20» مەملەكەتتىك قورىنىڭ بەلسەندى قولداۋىمەن ساپالى كوشەت ماتەريالىن ءوسىرۋ جۇمىستارى جۇرگىزىلۋدە. بۇل ماتەريال بولاشاقتا «اپورت» سورتىن وتىرعىزاتىن جاڭا باقتاردىڭ نەگىزىنە اينالماق.
2024 جىلى جوڭعار الاتاۋىنىڭ تاۋلى ايماقتارىنان سيۆەرس جابايى الماسىنىڭ تۇقىمدارى جينالىپ، ولار سەبىلىپ، كوشەت پيتومنيگى قۇرىلدى. 2025 جىلعى اقپاندا ساپالى كوشەتتەر دايىنداۋ ماقساتىندا 10 گەكتار القاپتا قىسقى كوزتاڭبا (وكۋليروۆكا) جۇمىستارى جۇرگىزىلدى.
مينيسترلىك وكىلدەرىنىڭ الماتى وبلىسىنا جۇمىس ساپارى اۋىل شارۋاشىلىعى ۆيتسە-ءمينيسترى ازات سۇلتانوۆتىڭ توراعالىعىمەن وتكەن كەڭەسپەن اياقتالدى. كەڭەسكە سالالىق قۇرىلىمدار مەن عىلىمي قاۋىمداستىق وكىلدەرى قاتىستى. وندا قازاق جەمىس-كوكونىس شارۋاشىلىعى عىلىمي-زەرتتەۋ ينستيتۋتىنىڭ «تالعار» وڭىرلىك فيليالى باسشىسىنىڭ ەسەبى تىڭدالدى. سونىمەن قاتار جوبانى ىسكە اسىرۋعا كەدەرگى كەلتىرىپ وتىرعان ماسەلەلەر تالقىلانىپ، ولاردى شەشۋدىڭ ناقتى جولدارى ايقىندالدى. ءتيىستى قۇرىلىمدارعا ناقتى تاپسىرمالار بەرىلدى.
ايتا كەتەيىك، 2027 جىلدىڭ سوڭىنا دەيىن 110 گەكتار باق وتىرعىزۋ كوزدەلىپ وتىر.
سونىمەن قاتار، «اپورت» الماسىن ۇلتتىق برەند رەتىندە كەڭىنەن ناسيحاتتاۋ جۇمىستارى جۇرگىزىلۋدە. اتاپ ايتقاندا، بيىلعى قىركۇيەك ايىندا قازاق جەمىس-كوكونىس شارۋاشىلىعى عىلىمي-زەرتتەۋ ينستيتۋتىنىڭ پومولوگيالىق باعى بازاسىندا «باق كۇنى» شاراسى وتەدى.
اۋىل شارۋاشىلىعى مينيسترلىگى جول كارتاسىن ىسكە اسىرۋ شەڭبەرىندە بارلىق ءىس-شارالاردى ۇيلەستىرىپ، جوبانىڭ عىلىمي نەگىزىن، ساباقتاستىعىن جانە ورنىقتى دامۋىن قامتاماسىز ەتۋدى جالعاستىرادى.
