«جەر اماناتى» كوميسسياسىنىڭ باستاماسىمەن ينتەراكتيۆتى كارتا ازىرلەندى

2544
Adyrna.kz Telegram

«AMANAT» پارتياسى جانىنداعى «جەر اماناتى» كوميسسياسىنىڭ باستاماسىمەن jerkarta.gharysh.kz گەوسەرۆيسى ىسكە قوسىلدى. اتالعان سەرۆيس مەملەكەت مەنشىگىنە قايتارىلعان جەر ۋچاسكەلەرىنە مونيتورينگ جۇرگىزۋگە، ونىڭ قايدا ورنالاسقانىن، كونتۋرىن انىقتاۋعا، سونداي-اق اۋدانى مەن مەنشىك يەسى نەمەسە جەر پايدالانۋشىسى تۋرالى مالىمەتتەر الۋعا مۇمكىندىك بەرەدى.

ينتەراكتيۆتى كارتانى اۋىل شارۋاشىلىعى مينيسترلىگى مەن تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى ازىرلەدى.

پرەزيدەنت تاپسىرماسىنا سايكەس، ەلىمىزدە پايدالانىلماي جاتقان جانە زاڭسىز بولىنگەن اۋىل شارۋاشىلىعى ماقساتىنداعى جەرلەردى مەملەكەت مەنشىگىنە قايتارۋ جۇمىسى جۇرگىزىلىپ جاتىر. 

وسى جۇمىستىڭ جۇيەلى ىسكە اسىرىلۋىنا قوعامدىق باقىلاۋ جۇرگىزۋ ماقساتىندا «AMANAT» پارتياسى جانىنان رەسپۋبليكالىق جانە وڭىرلىك «جەر اماناتى» كوميسسيالارى قۇرىلدى.

بۇگىندە پايدالانىلماي جاتقان 5,2 ملن گەكتار جەر مەملەكەت مەنشىگىنە قايتارىلدى. ونىڭ 3 ملن گەكتاردان استامى «جەر اماناتى» كوميسسياسىنىڭ ارالاسۋىمەن قايتارىلدى.

بىلتىر جەلتوقساندا پارتيالىقتار ءاربىر اۋىلدىق ەلدى مەكەندەگى جايىلىم تاپشىلىعىن جانە مەملەكەت مەنشىگىنە قايتارىلعان جەر ۋچاسكەلەرىنىڭ تىزبەسىن كورسەتەتىن ينتەراكتيۆتى كارتا ازىرلەۋدى ۇسىندى.

كوميسسيانىڭ «جەدەل جەلىسىنە» تۇرعىندار تاراپىنان 2,5 مىڭنان استام ءوتىنىش كەلىپ ءتۇستى. ونىڭ بارلىعى جەرگىلىكتى اكىمدىكتەرمەن جانە بەيىندى مينيسترلىكپەن بىرلەسىپ مۇقيات قارالدى.

بارلىق زاڭ بۇزۋ فاكتىلەرى تۋرالى 8 800 080 44 41 تەلەفونىنا حابارلاۋعا بولادى. وتىنىمدەر WhatsApp ارقىلى دا +7 700 800 44 41 ءنومىر بويىنشا قابىلدانادى. 

«جەر اماناتى» كوميسسياسىنىڭ جۇمىسى جالعاسىپ جاتىر.

پىكىرلەر