«رەفەرەندۋم–2026» ونلاين مارافونى بارىسىندا قازاقستاننىڭ كونستيتۋتسيالىق سوتى توراعاسىنىڭ ورىنباسارى باقىت نۇرمۇحانوۆ ماڭىزدى جاڭالىقتى جاريالادى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، وسى ۋاقىتقا دەيىن تەك باق پەن ادەبيەتتە قولدانىلىپ كەلگەن «اتا زاڭ» ۇعىمى ەندى ەلدىڭ نەگىزگى قۇجاتىنىڭ رەسمي ماتىنىندە بەكىتىلمەك.
نۇرمۇحانوۆتىڭ سوزىنشە، بۇرىن «اتا زاڭ» تىركەسى تەك ماقالالار مەن جۋرنالداردا قولدانىلىپ كەلگەن. ال جاڭا جوبا نۇسقاسىندا بۇل ۇعىم زاڭنامالىق مارتەبەگە يە بولىپ وتىر.
ونىڭ ايتۋىنشا، جوبا ءماتىنىنىڭ سوڭىندا ء«بىرتۇتاس قازاقستان حالقى ەلىمىزدىڭ اتا زاڭىن — كونستيتۋتسياسىن قابىلدايمىز» دەگەن ناقتى تۇجىرىم ەنگىزىلگەن.
سونىمەن قاتار، جاڭا رەداكتسيادا پرەامبۋلادا «قازاقستان حالقى» ەمەس، ء«بىرتۇتاس قازاقستان حالقى» دەگەن انىقتاما قولدانىلعان. بۇل ەلدەگى 100-دەن استام ۇلت پەن 20-عا جۋىق كونفەسسيا وكىلدەرىنىڭ بىرلىگىن زاڭ جۇزىندە بەكىتۋگە باعىتتالعان.
جوباعا سايكەس، كونستيتۋتسيا ماتىنىندە العاش رەت قازاقستان اۋماعىنداعى مىڭداعان جىلدىق مەملەكەتتىلىك تاريحىنىڭ ساباقتاستىعى اتاپ وتىلەدى. بۇل ەلدىڭ تاريحى تەك 1991 جىلدان باستالمايتىنىن كورسەتەدى.
ايتا كەتەيىك، جاڭا كونستيتۋتسيا جوباسى الدىمەن قازاق تىلىندە دايىندالىپ، كەيىن رەسمي تىلگە اۋدارىلعان. اقپاراتتى Kazinform اگەنتتىگى جاريالادى.
