Europada qazaq mūnaiynyŋ tapşylyǧy tuyndap, ırı mūnai treiderı Gunvor Group Soltüstık teŋızden şikızat satyp alu kölemın kürt arttyrdy, dep habarlaidy "Adyrna" ūlttyq portaly Bloomberg agenttıgıne sıltep.
Aqparat deregınşe, kompaniia soŋǧy ekı künde Soltüstık teŋız mūnaiynyŋ bes partiiasyn satyp alǧan.
Basylym mälımetıne säikes, Kaspii qūbyr konsorsiumy (KQK) jüiesındegı ırkılısterge bailanysty Qazaqstan mūnaiynyŋ Europaǧa eksporty şamamen ekı ese qysqarǧan. Sarapşylar mūnai jetkızuge ūşqyşsyz apparattar şabuyly, qolaisyz aua raiy jäne josparly jöndeu jūmystarynyŋ kedergı keltırgenın mälımdedı.
Būǧan qosa, Liviiadaǧy jükteu üderısınıŋ üzıluı men Norvegiiadaǧy Johan Castberg ken ornyndaǧy tehnikalyq qyzmet körsetu jaǧdaidy uşyqtyrǧan.
Qazır Europada fizikalyq mūnai naryǧynda aiqyn teŋgerımsızdık qalyptasty. Auyr, kükırttı mūnai türlerı naryqta artyq bolsa, Qazaqstannyŋ CPC Blend markasyna jatatyn jeŋıl ärı az kükırttı mūnai tapşylyqqa ainalǧan. Al Aziiada OPEK+ öndırısınıŋ ösuı men Venesueladan keletın arzan mūnai aǧyny saldarynan auyr sorttar köbeigen.
Tuyndaǧan tapşylyq baǧanyŋ ösuıne äkeldı. Soltüstık teŋız mūnaiynyŋ negızgı sorttaryna berıletın üsteme baǧa bır apta ışınde barrelıne şamamen 1 AQŞ dollaryna östı. Ädette arzan sanalatyn Forties sorty Brent etalonynan 2 dollarǧa juyq premiiamen satylyp jatyr. Būl — 2024 jyldyŋ tamyzynan bergı eŋ joǧary körsetkış.
Sonymen qatar, WTI men Brent markalary arasyndaǧy baǧa aiyrmaşylyǧy aitarlyqtai ūlǧaidy. AQŞ mūnaiynyŋ fiuchersterı Brent-ten barrelıne 4,76 dollar arzan saudalanuda. Būl — 2025 jyldyŋ säuırınen bergı eŋ ülken alşaqtyq.
Qazaqstandyq Brent mūnaiynan tömen baǧalanatyn CPC Blend qaŋtar aiynda soŋǧy bır jylda alǧaş ret premiiamen satyldy. Treiderlerdıŋ aituynşa, onyŋ üsteme baǧasy barrelıne şamamen 1,2 dollardy qūraǧan. Būǧan Novorossiiskıden josparlanǧan 45 tankerlık jöneltudıŋ kemınde 21-ınıŋ keiınge qaldyryluy nemese tolyq toqtatyluy sebep bolǧan.
Sarapşylar jaǧdai aua raiy jaqsaryp, Qara teŋız terminalyndaǧy jöneltu qalypqa kelgen soŋ tūraqtalady dep boljap otyr. Aldyn ala baǧalauǧa säikes, aqpan aiynda qazaqstandyq mūnai eksporty täulıgıne 1,5 mln barrelge deiın artuy mümkın. Qaŋtarda būl körsetkış 500 myŋ barrelge deiın tömendegen.
