ءماجىلىس قازاقستان مەن فرانتسۋز ۇكىمەتتەرى اراسىنداعى ادامداردى رەادميسسيالاۋ تۋرالى كەلىسىمدى راتيفيكاتسيالادى. كەلىسىمگە 2024 جىلعى 5 قاراشادا مەملەكەت باسشىسىنىڭ فرانتسياعا ساپارى بارىسىندا قول قويىلعان، دەپ حابارلايدى «ادىرنا» ءتىلشىسى.
بۇل كەلىسىمنىڭ نەگىزگى ماقساتى – ۇلتتىق زاڭنامالار تالاپتارىن بۇزىپ، ەكى ەلدىڭ اۋماعىندا جۇرگەن ادامداردى رەادميسسيالاۋ ماسەلەلەرى بويىنشا ەكىجاقتى ىنتىماقتاستىققا قۇقىقتىق نەگىز قالاۋ. قۇجاتتا وسى ەلدەر اۋماعىندا بولۋ شارتتارىن بۇزعان نەمەسە قيىن جاعدايعا تاپ بولعان، ايتالىق قۇجاتىن جوعالتقان ادامداردى ءوز ەلىنە قايتارۋ قاراستىرىلعان.
قازاقستان ازاماتتارى جەكە باسىن كۋالاندىراتىن قۇجاتتارىنىڭ جوعالعانى نەمەسە ەلدە زاڭسىز جۇرگەنى تۋرالى قۇزىرەتتى ورگاندارعا حابارلاعان جاعدايدا فرانتسيادان ەشقانداي سانكتسياسىز ورالا الادى. بۇل رەتتە وسى ەلدىڭ ىشكى ىستەر مينيسترلىگى ازاماتتىڭ ءوز ەلىنە قايتۋى ءۇشىن قۇجاتتارىن رەسىمدەۋگە كومەكتەسەدى.
سونىمەن قاتار كەلىسىم ءۇشىنشى ەل ازاماتتارى مەن ازاماتتىعى جوق ادامداردى ولاردىڭ ازاماتتىعى بار نەمەسە تۇراقتى مەكەندەيتىن مەملەكەتتەرىنە قابىلداۋ، اۋىستىرۋ جانە ترانزيتتىك تاسىمالداۋ رەسىمدەرىندەگى بىرلەسكەن ءىس-قيمىلداردىڭ بىرىزدىلىگى مەن رەتتىلىگىن قامتاماسىز ەتەدى.
ايتا كەتەيىك، رەادميسسيا – ءبىر مەملەكەتتەن باسقا مەملەكەتكە كىرۋى، بولۋى نەمەسە تۇرۋى زاڭسىز دەپ تانىلعان ازاماتتاردى ءوز ەلىنە قايتارۋ ءراسىمى. قازاقستاندا رەادميسسيا ينستيتۋتى 22 ەلمەن ارادا بەلسەندى جۇمىس ىستەيدى. سوڭعى جىلى رەادميسسيا بويىنشا 273 ءوتىنىشحات قارالدى.
