ەۋروپالىق وداقتىڭ رەسەيگە قارسى جاڭا، 13-ءشى سانكتسيالار پاكەتى جاريالاندى. ول العاش رەت «ماسكەۋدىڭ اسكەري ارەكەتتەرىن قولدادى» دەپ ايىپتالعان قىتايلىق جانە ءۇندى كومپانيالارىنا باعىتتالعان. بۇل تۋرالى The Financial Times جازدى، دەپ حابارلايدى “ادىرنا” ۇلتتىق پورتپلى.
باسىلىم مالىمەتىنە سايكەس، سانكتسيالار ماتەريكتىك قىتايدان ءۇش كومپانياعا جانە ءۇندىستاننان ءبىر كومپانياعا اسەر ەتەدى. سونىمەن قاتار، ولار شري-لانكا، تۇركيا، تايلاند، سەربيا جانە قازاقستان كاسىپورىندارىنا قارسى باعىتتالادى.
«ساۋدا شەكتەۋلەرىن ەنگىزۋ وسى كومپانيالاردىڭ رەسەيگە قارۋ-جاراق، ونىڭ ىشىندە ەلەكترونيكا مەن ميكروچيپتەردى ءوندىرۋ ءۇشىن قولدانىلاتىن جابدىقتاردى جەتكىزۋدەگى كومەگىن انىقتاعاننان كەيىن جوسپارلانۋدا»، - دەلىنگەن ماقالادا.
وندا ناقتى قانداي كومپانيالار ەكەنى كورسەتىلمەگەن. جالپى، باسىلىمنىڭ مالىمەتىنشە، شەكتەۋلەر 200-گە جۋىق جەكە جانە زاڭدى تۇلعالارعا اسەر ەتەدى.
سونداي-اق، ەو شەنەۋنىكتەرى وتكەن اپتاداعى رەسەيلىك وپپوزيتسيالىق ساياساتكەر الەكسەي ناۆالنىيدىڭ ولىمىنە جاۋاپ رەتىندە قوسىمشا سانكتسيالار كەزەڭىن تالقىلاپ جاتىر.
“ەۋرووداق ەلشىلەرى ءبىر كۇن بۇرىن قول جەتكىزگەن كەلىسىم سانكتسيالار پاكەتىن 24 اقپاندا ۋكراينادا سوعىس قيمىلدارىنىڭ باستالعانىنا ەكى جىل تولۋىنا وراي رەسمي تۇردە بەكىتۋگە مۇمكىندىك بەرەدى”، دەپ حابارلايدى باسىلىم.
وتكەن جىلدىڭ كۇزىندە قازاقستان پرەزيدەنتى قاسىم-جومارت توقاەۆ گەرمانياعا ساپارى كەزىندە استانا باتىس ەلدەرى رەسەيگە سالعان سانكتسيالىق رەجيمدى ۇستاناتىنىن ايتقان. اعىمداعى جىلدىڭ قاڭتارىندا رەسپۋبليكانىڭ ساۋدا جانە ينتەگراتسيا ءمينيسترى ارمان شاققاليەۆ سوڭعى جارتى جىلدا قازاقستاندا سانكتسيالىق رەجيمدى بۇزاتىن بىردە-ءبىر كومپانيا انىقتالماعانىنا سەندىردى.
