Мемлекеттік сарайда Моңғолия резиденті Ухнаагийн Хүрэлсүхтің «Дәстүрлі моңғол медицинасын дамыту туралы» жарлыққа қол қоюының салтанатты рәсімі өтті, деп хабарлайды "Адырна" ұлттық порталы montsame.mn-ге сілтеп.
Іс-шара барысында мемлекет басшысы дәстүрлі моңғол медицинасының елдің тарихи мұрасының, мәдени дәстүрлерінің және зияткерлік әлеуетінің ажырамас бөлігі екенін атап өтті.
Президенттің айтуынша, дәстүрлі моңғол медицинасының тарихы бес мың жылдан аса уақытты қамтиды. 1681 жылы көрнекті емші Эрдэнэбандида хутугт Лувсанданзанжанцан елдегі алғашқы маарамбтар мен диетолог-дәрігерлерді даярлайтын мектептің негізін қалап, оны оқу-емдеу мекемесі ретінде жүйелеген.
Ғасырлар бойы оқу және клиникалық құрал ретінде қолданылған «Адам денесінің құрылысы туралы жоғары дәрежеде бекітілген трактат» атты бірегей еңбек 2025 жылы ЮНЕСКО-ның материалдық емес мәдени мұралар тізіміне енгізілген. Бұл шешім дәстүрлі моңғол медицинасының халықаралық беделін арттырып, кеңінен танылуына ықпал еткен.
Биыл Моңғолиядағы дәстүрлі медицина мектебінің құрылғанына 345 жыл толуына орай және осы саладағы заманауи қызмет көрсету жүйесін дамыту аясында «Дәстүрлі моңғол медицинасын дамыту туралы» жарлық қабылданды.
Құжатқа сәйкес, Үкіметке дәстүрлі медицина саласының құқықтық базасын жетілдіру, оны озық технологиялар мен жасанды интеллект негізінде дамыту, білікті кадрлар жүйесін қалыптастыру, сондай-ақ дәстүрлі дәрі-дәрмектердің сапасы, қауіпсіздігі мен стандартталуын қамтамасыз ету жөнінде кешенді саясат жүргізу тапсырылды.
