موڭعوليا استاناسى ۇلان-باتىردا ءوتىپ جاتقان كۇرەستەن رەيتينگتىك تۋرنيردە قازاقستان قۇراماسى بىرنەشە جۇلدەگە قول جەتكىزدى. ەل قۇراماسىنىڭ كوشباسشىلارىنىڭ ءبىرى ازامات داۋلەتبەكوۆ كۇمىس مەدال يەلەندى. بۇل تۋرالى ۇلتتىق وليمپيادا كوميتەتى مالىمدەدى، دەپ حابارلايدى "ادىرنا".
اقپاراتقا سايكەس، ەركىن كۇرەستەن 92 كەلىگە دەيىنگى سالماق دارەجەسىندە سىنعا تۇسكەن ازامات داۋلەتبەكوۆ ءتۋرنيردىڭ كۇمىس جۇلدەگەرى اتاندى.
ول جارىس بارىسىندا ءساتتى ونەر كورسەتىپ، فينالعا دەيىن جەتكەن.
ەركىن كۇرەستەگى تاعى ءبىر جۇلدەنى بولات ساقاەۆ قورجىنعا سالدى.
86 كەلىگە دەيىنگى سالماقتا بەلدەسكەن قازاقستاندىق بالۋان ءتۋرنيردى ءۇشىنشى ورىنمەن اياقتاپ، قولا مەدالعا يە بولدى.
قازاقستان ايەلدەر قۇراماسىنىڭ وكىلى ەلميرا سىزدىقوۆا دا جۇلدەگەرلەر قاتارىنان كورىندى.
76 كەلىگە دەيىنگى سالماق دارەجەسىندە كۇرەسكەن سپورتشى قولا مەدال يەلەنىپ، ۇلتتىق قۇرامانىڭ جالپى كورسەتكىشىن جاقسارتتى.
بۇعان دەيىن ۇلان-باتىرداعى تۋرنيردە قازاقستاندىق سپورتشىلار تاعى بىرنەشە مەدال جەڭىپ العان بولاتىن.
گرەك-ريم كۇرەسىنەن:
- ەركەبۇلان ارداقوۆ (63 كەلىگە دەيىن) – قولا مەدال;
- ولجاس سىرلىباي (130 كەلىگە دەيىن) – قولا مەدال.
ال ايەلدەر كۇرەسىندە نيلۋفار رايموۆا (57 كەلىگە دەيىن) دە قولا جۇلدەگەر اتاندى.
وسىلايشا قازاقستان قۇراماسى موڭعولياداعى حالىقارالىق رەيتينگتىك تۋرنيردە مەدالدار سانىن كوبەيتۋدى جالعاستىرىپ جاتىر.
