رەسەي پرەزيدەنتى ۆلاديمير پۋتين ۋكراينا پرەزيدەنتى ۆلاديمير زەلەنسكي ۇسىنعان تىكەلەي كەزدەسۋ وتكىزۋ جانە سول كەزەڭدە اتىستى توقتاتۋ باستاماسىن قولدامادى، دەپ حابارلايدى "ادىرنا" ۇلتتىق پورتالى.
DW دەرەگىنشە، سانكت-پەتەربۋرگ حالىقارالىق ەكونوميكالىق فورۋمىنىڭ پلەنارلىق وتىرىسىندا سويلەگەن پۋتين قازىرگى جاعدايدا مۇنداي كەزدەسۋدىڭ ءمانى جوق ەكەنىن ايتتى. ونىڭ سوزىنشە، مەملەكەت باسشىلارى دەڭگەيىندەگى كەزدەسۋ الدىمەن ناقتى كەلىسىمدەر ازىرلەنگەننەن كەيىن عانا ناتيجە بەرە الادى. رەسەي پرەزيدەنتى زەلەنسكيدىڭ وزىنە ارناعان اشىق حاتىن «دورەكىلىك ەلەمەنتتەرى بار قاعاز» دەپ اتاپ، ونى تەك ءۇستىرت قاراپ شىققانىن مالىمدەدى. سونىمەن قاتار ول ۋكراينا پرەزيدەنتىمەن كەزدەسۋدەن ەشقاشان باس تارتپاعانىن، الايدا «ناتيجەسىز اڭگىمەگە ۋاقىت جوعالتقىسى كەلمەيتىنىن» جەتكىزدى.
فورۋم بارىسىندا پۋتين ۋكرايناداعى سوعىسقا قاتىسىپ جاتقان رەسەيلىك اسكەري قىزمەتكەرلەرگە دە ۇندەۋ جاساپ، ولاردىڭ قىزمەتىنە جوعارى باعا بەردى. ول اسكەري قىزمەتشىلەرگە «جۇمىستى جالعاستىرىڭدار، باۋىرلار» دەپ ءۇن قاتتى.
بۇعان دەيىن ۆلاديمير زەلەنسكي پۋتينگە جولداعان اشىق حاتىندا رەسەي ارمياسىنىڭ اي سايىنعى شىعىنى 30 مىڭنان استام قازا تاپقان جانە اۋىر جارالانعان ادامدى قۇرايتىنىن مالىمدەگەن. سونداي-اق ول ۋكراينا دروندارىنىڭ رەسەي اۋماعىنداعى نىساندارعا سوققى بەرۋ مۇمكىندىگى ارتقانىن اتاپ ءوتتى. ۋكراينا پرەزيدەنتى سوعىستىڭ رەسەي ءۇشىن جاعىمسىز سالدارى كوبەيىپ جاتقانىن ايتىپ، تاراپتارعا ءۇشىنشى ەل اۋماعىندا كەزدەسۋ وتكىزۋ ءۇشىن ناقتى كۇن بەلگىلەۋدى ۇسىنعان ەدى.
ال گەرمانيانىڭ سىرتقى ىستەر ءمينيسترى يوحانن ۆادەفۋل رەسەي مەن ۋكراينا اراسىنداعى قاقتىعىستى توقتاتۋ ءۇشىن كەلىسسوزدەردى جەدەلدەتۋگە شاقىرىپ، بەيبىت كەلىسسوزدەرگە ەۋروپالىق تاراپتاردىڭ دا قاتىسۋى ماڭىزدى ەكەنىن مالىمدەدى.
قازاقستان رەسەيدىڭ «بايتەرەك» كەشەنى بويىنشا ءوز مىندەتتەمەلەرىن ورىنداۋىن كەيىنگە قالدىرۋعا كەلىستى
