ۋگاندا سايلاۋ كوميسسياسى بەيسەنبى كۇنى وتكەن پرەزيدەنتتىك سايلاۋدىڭ الدىن الا قورىتىندىلارىن جاريالادى. بۇل تۋرالى ۆۆس جازدى، دەپ حابارلايدى "ادىرنا".
كوميسسيا مالىمەتىنشە، داۋىس بەرۋ ۋچاسكەلەرىنىڭ شامامەن جارتىسىندا بيۋللەتەندەر سانالىپ، قازىرگى پرەزيدەنت يوۆەري مۋسەۆەني 76,25% داۋىس جيناپ، نەگىزگى قارسىلاسى بوبي ۋايننان ايقىن باسىمدىقپەن الدا كەلەدى. بوبي ۋاين 19,85% داۋىس العان، قالعان داۋىس التى وزگە كانديداتقا تيەسىلى.
سايلاۋ قارساڭىندا وپپوزيتسيا تاراپىنان بيلىكتى سايلاۋ ناتيجەلەرىن بۇرمالادى دەگەن ايىپتاۋلار بولدى. سونداي-اق ەلدە ينتەرنەتتىڭ ۋاقىتشا وشىرىلگەنى حابارلاندى. بوبي ۋاين جاقتاستارىن نارازىلىق اكتسيالارىنا شاقىرعانىمەن، قازىرگى ۋاقىتتا جاپپاي شەرۋلەر تىركەلمەگەن.
بوبي ۋاين جەتەكشىلىك ەتەتىن «ۇلتتىق بىرلىك پلاتفورماسى» پارتياسى اسكەريلەر مەن پوليتسيا كامپالا قالاسىنداعى وپپوزيتسيا جەتەكشىسىنىڭ ءۇيىن قورشاۋعا العانىن مالىمدەدى. پارتيا وكىلدەرىنىڭ ايتۋىنشا، ۋاين مەن ونىڭ جۇبايى ءىس جۇزىندە ۇيقاماقتا وتىر. الايدا پوليتسيا بۇل اقپاراتتى راستامادى.
81 جاستاعى يوۆەري مۋسەۆەني ۋگاندانى 1986 جىلدان بەرى باسقارىپ كەلەدى. ول بيلىككە اسكەري توڭكەرىس ناتيجەسىندە كەلگەن. بيلىككە جاقىن اقپارات كوزدەرى ونى ەلدەگى تۇراقتىلىقتىڭ كەپىلى رەتىندە سيپاتتايدى. ال سىنشىلار مۋسەۆەنيدى بيلىكتى جەكە قولىنا شوعىرلاندىردى جانە وپپوزيتسياعا قىسىم جاسايدى دەپ ايىپتايدى.
ال بوبي ۋاين — رەگگي جانرىنداعى تانىمال مۋزىكانت، جاستار اراسىندا كەڭ قولداۋعا يە ساياساتكەر. ونىڭ پارتياسى دەنساۋلىق ساقتاۋ، ءبىلىم بەرۋ، تازا اۋىز سۋعا قولجەتىمدىلىك پەن ءادىل سوت جۇيەسىن دامىتۋعا باسىمدىق بەرەدى. ۋگاندا حالقىنىڭ ورتاشا جاسى 16-عا تەڭ، بۇل ەلدى الەمدەگى ەڭ جاس مەملەكەتتەردىڭ بىرىنە اينالدىرادى.
