Уганда сайлау комиссиясы бейсенбі күні өткен президенттік сайлаудың алдын ала қорытындыларын жариялады. Бұл туралы ВВС жазды, деп хабарлайды "Адырна".
Комиссия мәліметінше, дауыс беру учаскелерінің шамамен жартысында бюллетеньдер саналып, қазіргі президент Йовери Мусевени 76,25% дауыс жинап, негізгі қарсыласы Боби Уайннан айқын басымдықпен алда келеді. Боби Уайн 19,85% дауыс алған, қалған дауыс алты өзге кандидатқа тиесілі.
Сайлау қарсаңында оппозиция тарапынан билікті сайлау нәтижелерін бұрмалады деген айыптаулар болды. Сондай-ақ елде интернеттің уақытша өшірілгені хабарланды. Боби Уайн жақтастарын наразылық акцияларына шақырғанымен, қазіргі уақытта жаппай шерулер тіркелмеген.
Боби Уайн жетекшілік ететін «Ұлттық бірлік платформасы» партиясы әскерилер мен полиция Кампала қаласындағы оппозиция жетекшісінің үйін қоршауға алғанын мәлімдеді. Партия өкілдерінің айтуынша, Уайн мен оның жұбайы іс жүзінде үйқамақта отыр. Алайда полиция бұл ақпаратты растамады.
81 жастағы Йовери Мусевени Уганданы 1986 жылдан бері басқарып келеді. Ол билікке әскери төңкеріс нәтижесінде келген. Билікке жақын ақпарат көздері оны елдегі тұрақтылықтың кепілі ретінде сипаттайды. Ал сыншылар Мусевениді билікті жеке қолына шоғырландырды және оппозицияға қысым жасайды деп айыптайды.
Ал Боби Уайн — регги жанрындағы танымал музыкант, жастар арасында кең қолдауға ие саясаткер. Оның партиясы денсаулық сақтау, білім беру, таза ауыз суға қолжетімділік пен әділ сот жүйесін дамытуға басымдық береді. Уганда халқының орташа жасы 16-ға тең, бұл елді әлемдегі ең жас мемлекеттердің біріне айналдырады.
