رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا ماسكەۋدىڭ تمد ەلدەرىنە، سونىڭ ىشىندە ورتالىق ازيا مەملەكەتتەرىنە قاتىستى ساياساتىنا بايلانىستى پىكىر ءبىلدىرىپ، جۇرتشىلىقتى رەسمي اقپارات كوزدەرىنە عانا سۇيەنۋگە جانە فەيككە ەرمەۋگە شاقىردى، دەپ حابارلايدى "ادىرنا".
بريفينگ بارىسىندا جۋرناليستەر زاحاروۆادان ۆلاديمير سولوۆەۆتىڭ ەفيردە ايتقان سوزدەرىن قالاي قابىلداۋ كەرەگىن سۇراعان. وسىعان جاۋاپ بەرگەن ديپلومات رەسەيدىڭ رەسمي پوزيتسياسىن تەك ارنايى ۋاكىلەتتى تۇلعالار بىلدىرەتىنىن اتاپ ءوتتى.
«رەسمي ۇستانىمدى ونى ايتۋعا قۇقىعى بار رەسمي تۇلعالار عانا بىلدىرەدى»، – دەدى زاحاروۆا.
زاحاروۆانىڭ ايتۋىنشا، رەسەيدىڭ ورتالىق ازيا ەلدەرىمەن قارىم-قاتىناسقا قاتىستى كوزقاراسى بىرنەشە مارتە جوعارى دەڭگەيدە ايتىلعان جانە ول سەرىكتەستىك پەن ءوزارا سىيلاستىققا نەگىزدەلگەن.
ول رەسەي مەن ورتالىق ازيا حالىقتارىن تاريحي تۇرعىدا تاتۋ كورشىلىك، ستراتەگيالىق ارىپتەستىك جانە ىنتىماقتاستىق بايلانىستارى بىرىكتىرەتىنىن جەتكىزدى. سونداي-اق تمد جانە ۇقشۇ الاڭىنداعى تۇراقتى ءوزارا ءىس-قيمىل قاۋىپسىزدىك ماسەلەلەرىن تالقىلاۋدا ماڭىزدى ءرول اتقاراتىنىن اتاپ ءوتتى.
ماريا زاحاروۆا جەكە ءبىر مالىمدەمەلەرگە قاراپ قورىتىندى جاساۋ دۇرىس ەمەس ەكەنىن ايتىپ، مەملەكەتارالىق قاتىناستاردى ناقتى ارەكەتتەرگە سۇيەنە وتىرىپ باعالاۋعا شاقىردى.
«مۇنداي ارانداتۋلار كوپ بولۋى مۇمكىن. سوندىقتان شىنايى فاكتىلەرگە سۇيەنىپ، جالعان اقپاراتقا ەرمەۋ كەرەك»، – دەدى ول.
ۆلاديمير سولوۆەۆتىڭ مالىمدەمەلەرى تالقىلانىپ جاتقان تۇستا، باق-تا ونىڭ ەفير كەستەسىندەگى وزگەرىستەرگە دە نازار اۋدارعان. رەسەيلىك مەديانىڭ جازۋىنشا، سوڭعى ۋاقىتتا “روسسيا 1” ارناسىندا “ۆەچەر س ۆلاديميروم سولوۆەۆىم” باعدارلاماسى كورسەتىلمەي قالعان. 12 قاڭتاردان بەرى ونىڭ ورنىنا باسقا باعدارلاما بەرىلىپ جاتىر.
Sib.fm دەرەگىنشە، بۇعان ءجۋرناليستىڭ ەفير بارىسىندا ورتالىق ازيادا «جاڭا ارنايى اسكەري وپەراتسيا بولۋى مۇمكىن» دەگەن وي ايتۋى سەبەپ بولعان. سونىمەن قاتار ول ايماقتاعى بۇرىنعى كەڭەستىك رەسپۋبليكالاردى ء«بىزدىڭ جەرىمىز» دەپ اتاعان.
بۇل تۇجىرىمدار سىرتقى ساياساتتا نارازىلىق تۋدىرىپ، ديپلوماتتارعا سەرىكتەس ەلدەرگە سولوۆەۆتىڭ ايتقاندارى ماسكەۋدىڭ رەسمي باعىتى ەمەس ەكەنىن تۇسىندىرۋگە تۋرا كەلگەن. رەسەي ءسىم-ءىنىڭ ىشىندە مۇنداي جاعدايلار «تىكەلەي ەفيردەگى وزىنە ءوزى وق اتۋ» دەپ اتالادى دەگەن اقپارات تا جاريالاندى.
بۇعان دەيىن ءماجىلىس دەپۋتاتى ايدوس سارىم سولوۆەۆتىڭ مالىمدەمەسىن «اتىسقا تۇرمايتىن ماسانىڭ شاعۋىمەن» سالىستىرعان. ال قىرعىزستاندا سولوۆەۆتى پەرسونا نون گراتا دەپ جاريالاۋ مۇمكىندىگى دە قاراستىرىلىپ جاتىر.
