اقش يرانداعى جاپپاي نارازىلىق اكتسيالارىن كۇشپەن باسىپ-جانشۋعا قاتىسى بار دەپ ايىپتالعان بەس يراندىق شەنەۋنىككە قارسى سانكتسيا ەنگىزدى. بۇل تۋرالى اقش قارجى مينيسترلىگى مالىمدەدى، دەپ حابارلايدى "ادىرنا".
سانكتسيا تىزىمىنە يراننىڭ ۇلتتىق قاۋىپسىزدىك جونىندەگى جوعارى كەڭەسىنىڭ حاتشىسى ءالي لاريدجاني ەنگىزىلگەن. سونىمەن قاتار لورەستان جانە فارس پروۆينتسيالارىنداعى وڭىرلىك پوليتسيا بولىمشەلەرى مەن يسلام رەۆوليۋتسياسى ساقشىلار كورپۋسى كۇشتەرىن باسقارعان ءتورت ادام دا شەكتەۋگە ءىلىندى.
اقش تاراپىنىڭ حابارلاۋىنشا، ءالي لاريدجاني يرانداعى نارازىلىقتارعا قارسى قابىلدانعان شارالاردى ۇيلەستىرۋگە جاۋاپتى بولعان ءارى بەيبىت شەرۋلەردى كۇش قولدانۋ ارقىلى باسۋعا اشىق تۇردە ۇندەگەن. ال سانكتسياعا ەنگەن باسقا تۇلعالار مەن كۇشتىك قۇرىلىم وكىلدەرى شەرۋشىلەرگە قاتىستى زورلىق-زومبىلىق كورسەتۋگە جانە نارازىلىققا شىققانداردىڭ قازا تابۋىنا قاتىسى بار دەپ ايىپتالدى.
اقش قارجى مينيسترلىگى رەسمي مالىمدەمەسىندە 2025 جىلدىڭ جەلتوقسان ايىنان بەرى يرانداعى قاۋىپسىزدىك كۇشتەرى نارازىلىق بىلدىرۋشىلەرگە قارسى وق جاۋدىرىپ، ازاماتتاردى ءومىرى مەن بوستاندىعىنان ايىردى دەپ كورسەتكەن.
بۇدان بولەك، اقش فارديس تۇرمەسىنە قاتىستى دا سانكتسيا ەنگىزدى. مەملەكەتتىك دەپارتامەنتتىڭ مالىمدەۋىنشە، اتالعان مەكەمەدە ايەلدەرگە قاتىستى «قاتىگەز، ادامشىلىققا جات ءارى ار-نامىستى قورلايتىن» وزبىرلىق ارەكەتتەر جاسالعان.
سونىمەن بىرگە قارجى مينيسترلىگى يران مۇنايى مەن مۇناي ونىمدەرىن شەتەل نارىقتارىندا ساتۋدان تۇسكەن تابىستى «جاسىرىن بانكينگ» جۇيەلەرى ارقىلى زاڭداستىرۋعا قاتىسى بار دەپ كۇدىككە ىلىنگەن بىرقاتار جەكە تۇلعالار مەن ۇيىمدارعا دا سانكتسيا سالعانىن حابارلادى.
ايتا كەتەيىك، يراندا 2025 جىلعى جەلتوقسان ايىنىڭ سوڭىنان بەرى جاپپاي نارازىلىقتار جالعاسىپ كەلەدى. بۇل تولقۋلار 1979 جىلعى يسلام رەۆوليۋتسياسىنان كەيىنگى كەزەڭدە ەلدىڭ كلەريكالدىق بيلىك جۇيەسىنە تونگەن ەڭ ءىرى سىن-قاتەرلەردىڭ ءبىرى رەتىندە باعالانىپ وتىر.
نارازىلىقتىڭ باستاپقى سەبەبى – ۇلتتىق ۆاليۋتانىڭ (ريالدىڭ) كۇرت قۇنسىزدانۋى مەن ينفلياتسيانىڭ شەكتەن تىس ءوسۋى. الايدا ۋاقىت وتە كەلە الەۋمەتتىك تالاپتار ساياسيلانىپ، بيلىككە قارسى ۇراندار مەن مونارحيانى قايتا قالپىنا كەلتىرۋگە شاقىرعان ۇندەۋلەر دە ەستىلە باستاعان.
قۇقىق قورعاۋ ۇيىمدارىنىڭ دەرەگىنە سۇيەنسەك، نارازىلىقتار باستالعالى بەرى كەمىندە 3428 ادام قازا تاپقان. ال يراننىڭ سىرتقى ىستەر ءمينيسترى «مىڭداعان ادامنىڭ قازا بولعانى» تۋرالى اقپاراتتى جوققا شىعارىپ وتىر.
