فرانتسيا پرەزيدەنتى ەممانۋەل ماكرون يستر-لە-تيۋبە اسكەري بازاسىندا اسكەري قىزمەتكەرلەر الدىندا سويلەگەن كەزدە كوزىنىڭ قىزارعانى بايقالىپ، بۇل جاعداي جەلىدە قىزۋ تالقىلاندى، دەپ حابارلايدى "ادىرنا"
24.ru سايتى حابارلاعانداي، ينتەرنەت قولدانۋشىلارى فرانتسۋز كوشباسشىسىنىڭ مۇنداي كەلبەتىنىڭ سەبەبىن تالقىلاي باستادى. يرونياعا تولى نۇسقالاردىڭ ءبىرى بويىنشا، ماكرون تاعى دا تۇرمىستىق زورلىق-زومبىلىقتىڭ قۇربانى بولۋى مۇمكىن دەگەن بولجام ايتىلعان.
ال مەملەكەت باسشىسى ءوزى بۇل جاعدايدى اقتاۋعا تىرىسىپ، سىرتقى كەلبەتى «جىل باسىنداعى جولبارىستىڭ كوزى» دەگەن استارلى تىركەسكە مەڭزەۋ بولۋى مۇمكىن ەكەنىن جەتكىزدى. ونىڭ ايتۋىنشا، بۇل – ماقساتكەرلىكتى بىلدىرەتىن بەلگى. بۇدان وزگە تۇسىنىكتەمە بەرگەن جوق.
2025 جىلدىڭ مامىر ايىندا جەلىدە پرەزيدەنتتىك ۇشاقتىڭ ەسىگى اشىلعاننان كەيىن ماكروننىڭ جۇبايى بريجيت ونىڭ ەرنىنەن ۇرعان ءسات تۇسىرىلگەن بەينەجازبا تاراعان ەدى. ۆيدەونى ەليسەي سارايى راستاعان جانە بولعان جاعدايدى «ەرلى-زايىپتىلار اراسىنداعى ۇرىس-كەرىس» دەپ اتاعان. ال ماكرون ءوز كەزەگىندە بۇل وقيعا جۇبايىمەن «ازداپ ازىلدەسپەك بولعان» كەزدە ورىن العانىن ايتقان.
Le Parisien گازەتىنىڭ حابارلاۋىنشا، پرەزيدەنتتىڭ قىزارعان كوزبەن كوپشىلىك الدىنا شىعۋىنا بايلانىستى ەليسەي سارايى تۇسىنىكتەمە بەرىپ، بۇل كوزدەگى تامىردىڭ جارىلۋىنان بولعانىن جانە مەملەكەت باسشىسىنىڭ دەنساۋلىعىندا ەشقانداي ماسەلە جوق ەكەنىن مالىمدەگەن.
«بۇل – كوزدەگى تامىردان بولعان ازداعان قان قۇيىلۋ عانا. مۇندا ەشقانداي قاۋىپتى نارسە جوق»، – دەپ كەلتىرەدى باسىلىم فرانتسۋز پرەزيدەنتى اكىمشىلىگىنىڭ ءسوزىن.
ال CNews تەلەارناسى ماكروننىڭ «جولبارىستىڭ كوزى» تۋرالى ايتقانى امەريكالىق Survivor توبىنىڭ Eye of the Tiger («جولبارىستىڭ كوزى») انىنە مەڭزەۋ بولۋى مۇمكىن دەپ بولجادى. بۇل ءان سيلۆەستر ستاللونە باستى رولدە ويناعان «روككي 3» (Rocky III, 1982) فيلمىنە ساۋندترەك بولعان.
