پاريجدەگى اۋليە انا شىركەۋىنە كۇردەلى قايتا جاڭعىرتۋ جۇمىستارى جۇرگىزىلىپ، 7 جەلتوقسان كۇنى ەسىگىن قايتا اشادى، دەپ حابارلايدى "ادىرنا" ۇلتتىق پورتالى.
الايدا كەيبىر ساراپشىلار بۇل مەرزىمنىڭ تىم قىسقا بولعانىن ايتىپ الاڭداۋشىلىق بىلدىرۋدە.
15 ءساۋىر 2019 جىلى ورىن العان ءورت كەزىندە اۋليە انا شىركەۋىنىڭ شاتىرى مەن كۇمبەزى قاتتى زاقىمداندى. مىڭداعان پاريجدىكتەر مەن تۋريستتەر سوبوردىڭ جالىنعا ورانعانىن ۇرەيمەن باقىلاعان بولاتىن. پرەزيدەنت ەممانۋەل ماكرون شىركەۋدى بەس جىل ىشىندە قايتا قالپىنا كەلتىرۋگە ۋادە بەرگەن ەدى.
سوبوردى قالپىنا كەلتىرۋ ءۇشىن الەمنىڭ تۇكپىر-تۇكپىرىنەن 800 ميلليون ەۋرو كولەمىندە قارجى جينالدى. ونىڭ 700 ميلليون ەۋروسى قۇرىلىسقا جۇمسالعان. جاڭعىرتۋعا 250-گە جۋىق كومپانيا مەن شەبەرحانا اتسالىسقان.
گەرمانيا اۋليە انا شىركەۋىن قالپىنا كەلتىرۋگە ەرەكشە ۇلەس قوستى. DW مالىمەتىنشە، كەلن شىركەۋدەگى 1965 جىلى فرانتسۋز سۋرەتشىسى جاك لە شەۆالە جاساعان ءتورت ۆيتراجدى قالپىنا كەلتىردى. سونداي-اق، باۆاريالىق شەبەرلەر قوڭىراۋلاردىڭ ءتىلىن دايىنداۋعا اتسالىسقان.
الايدا كەيبىر ساراپشىلار قايتا قالپىنا كەلتىرۋ جۇمىستارىنىڭ اسىعىس جاسالعانىنا الاڭداۋلى. ارحيتەكتور باربارا شوك-ۆەرنەردىڭ ايتۋىنشا، قۇرىلىس ماتەريالدارىنىڭ، اسىرەسە اعاشتاردىڭ تولىق كەبۋگە ۇلگەرمەۋى بولاشاقتا قيىندىق تۋعىزۋى مۇمكىن.
7 جەلتوقسان كۇنى اۋليە انا شىركەۋىنىڭ قايتا اشىلۋ سالتاناتىنا 3000-عا جۋىق ارنايى قوناق قاتىسادى. ونىڭ ىشىندە الەمنىڭ 50 ەلىنىڭ باسشىلارى بار. فرانتسيا پرەزيدەنتى ەممانۋەل ماكرون سالتاناتتى جيىندا ءسوز سويلەيدى. ال 8 جەلتوقسان كۇنى سوبوردا العاشقى مەسسانى پاريج ارحيەپيسكوپى وتكىزەدى.
ورتەنىپ، قايتا قالىپقا كەلتىرىلگەن اۋليە انا شىركەۋىن كورۋ ءۇشىن ونلاين تىركەلۋ قاجەت، بىراق كىرۋ تەگىن بولادى. بۇل شەشىم كاتوليك شىركەۋىنىڭ تالابى بويىنشا قابىلدانعانى ايتىلدى.
شىركەۋدىڭ اشىلۋى كەزىندە پاريجدە قاۋىپسىزدىك كۇشەيتىلىپ، 6000-عا جۋىق ءتارتىپ ساقشىسى جۇمىس ىستەيدى. اشىلۋ سالتاناتىنا 40 مىڭعا جۋىق ادام قاتىسادى دەپ كۇتىلۋدە.
