Франция президенті Эммануэль Макрон Истр-ле-Тюбе әскери базасында әскери қызметкерлер алдында сөйлеген кезде көзінің қызарғаны байқалып, бұл жағдай желіде қызу талқыланды, деп хабарлайды "Адырна"
24.ru сайты хабарлағандай, интернет қолданушылары француз көшбасшысының мұндай келбетінің себебін талқылай бастады. Иронияға толы нұсқалардың бірі бойынша, Макрон тағы да тұрмыстық зорлық-зомбылықтың құрбаны болуы мүмкін деген болжам айтылған.
Ал мемлекет басшысы өзі бұл жағдайды ақтауға тырысып, сыртқы келбеті «жыл басындағы жолбарыстың көзі» деген астарлы тіркеске меңзеу болуы мүмкін екенін жеткізді. Оның айтуынша, бұл – мақсаткерлікті білдіретін белгі. Бұдан өзге түсініктеме берген жоқ.
2025 жылдың мамыр айында желіде президенттік ұшақтың есігі ашылғаннан кейін Макронның жұбайы Брижит оның ернінен ұрған сәт түсірілген бейнежазба тараған еді. Видеоны Елисей сарайы растаған және болған жағдайды «ерлі-зайыптылар арасындағы ұрыс-керіс» деп атаған. Ал Макрон өз кезегінде бұл оқиға жұбайымен «аздап әзілдеспек болған» кезде орын алғанын айтқан.
Le Parisien газетінің хабарлауынша, президенттің қызарған көзбен көпшілік алдына шығуына байланысты Елисей сарайы түсініктеме беріп, бұл көздегі тамырдың жарылуынан болғанын және мемлекет басшысының денсаулығында ешқандай мәселе жоқ екенін мәлімдеген.
«Бұл – көздегі тамырдан болған аздаған қан құйылу ғана. Мұнда ешқандай қауіпті нәрсе жоқ», – деп келтіреді басылым француз президенті әкімшілігінің сөзін.
Ал CNews телеарнасы Макронның «жолбарыстың көзі» туралы айтқаны америкалық Survivor тобының Eye of the Tiger («Жолбарыстың көзі») әніне меңзеу болуы мүмкін деп болжады. Бұл ән Сильвестр Сталлоне басты рөлде ойнаған «Рокки 3» (Rocky III, 1982) фильміне саундтрек болған.
