يراندا سوڭعى ءۇش جىلداعى ەڭ ءىرى ۇكىمەتكە قارسى جاپپاي نارازىلىقتار ەكى اپتادان بەرى جالعاسىپ جاتىر. ينتەرنەتتىڭ ءوشىرىلۋى مەن قاتاڭ قاۋىپسىزدىك شارالارىنا قاراماستان، سەنبى كۇنى كەشكە تەگەران مەن وزگە دە قالالاردا تۇرعىندار قايتادان كوشەگە شىقتى. بۇل تۋرالى BBC جازدى، دەپ حابارلايدى "ادىرنا".
نارازىلىقتار اياسىندا يراننىڭ سوڭعى تاقتان تايدىرىلعان شاحىنىڭ ۇلى رەزا پەحلەۆي شەرۋشىلەردى قالا ورتالىقتارىن باقىلاۋعا الىپ، نارازىلىقتى جالعاستىرۋعا شاقىردى.
اقش-تا ورنالاسقان Human Rights Activist News Agency (HRANA) قۇقىق قورعاۋ ۇيىمىنىڭ مالىمەتىنشە، نارازىلىقتار باستالعالى بەرى شامامەن 50 بەيبىت تۇرعىن مەن قاۋىپسىزدىك كۇشتەرىنىڭ 15 قىزمەتكەرى قازا تاپقان. سونداي-اق 2311-دەن استام ادام قاماۋعا الىنعان.
نورۆەگيادا تىركەلگەن Iran Human Rights (IHRNGO) ۇيىمى دا كەمىندە 50 ادامنىڭ كوز جۇمعانىن راستادى. ۇيىم دەرەگىنشە، قازا تاپقانداردىڭ اراسىندا توعىز بالا بار.
ينتەرنەت شەكتەۋلەرىنە قاراماستان، BBC قول جەتكىزگەن بەينەجازبالاردا يراننىڭ جوعارعى كوسەمى اياتوللا الي حامەنەيگە قارسى ۇراندار ايتىلىپ جاتقانىن كورۋگە بولادى. كەيبىر شەرۋشىلەر رەزا پەحلەۆيدىڭ ەسىمىن اتاپ، ونى قولدايتىنىن بىلدىرگەن.
اقش-تا جۇرگەن پەحلەۆي يراندىقتاردى دەمالىس كۇندەرى نارازىلىقتى جالعاستىرۋعا شاقىرىپ، «ۇلتتىق رەۆوليۋتسيا جەڭىسكە جەتكەن جاعدايدا» يرانعا ورالۋعا دايىن ەكەنىن مالىمدەدى.
يران بيلىگى تارتىپسىزدىكتەردى اقش-تىڭ ىقپالىمەن بايلانىستىرىپ وتىر. ەلدىڭ بۇۇ-داعى تۇراقتى وكىلى قاۋىپسىزدىك كەڭەسىنە جولداعان حاتىندا ۆاشينگتوندى يراننىڭ ىشكى ىستەرىنە ارالاستى دەپ ايىپتادى.
ماۋسىم ايىندا يراننىڭ يادرولىق نىساندارىنا سوققى جاسالعاننان كەيىن، اقش پرەزيدەنتى دونالد ترامپ ەگەر ۇكىمەت نارازىلىق بىلدىرۋشىلەرگە قارسى كۇش قولدانۋدى جالعاستىرسا، جاڭا شابۋىل جاسالۋى مۇمكىن ەكەنىن مالىمدەگەن.
اقش مەملەكەتتىك حاتشىسى ماركو رۋبيو X الەۋمەتتىك جەلىسىندە اقش يران حالقىن قولدايتىنىن جازدى.
ال بۇۇ باس حاتشىسىنىڭ وكىلى ستەفان دۋجارريك ادام ءولىمىنىڭ ارتۋىنا الاڭداۋشىلىق ءبىلدىرىپ، بيلىكتى بەيبىت شەرۋگە شىعۋ قۇقىعىن قامتاماسىز ەتۋگە شاقىردى.
يرانداعى نارازىلىقتار 28 جەلتوقساننان بەرى جالعاسىپ كەلەدى. وعان نەگىزگى سەبەپ — باعانىڭ كۇرت ءوسۋى مەن ۇلتتىق ۆاليۋتانىڭ قۇنسىزدانۋى. سوڭعى ءبىر جىلدا اقش دوللارىنىڭ باعامى شامامەن 80 پايىزعا وسكەن.
باستاپقىدا ەكونوميكالىق سيپاتتا بولعان تالاپتار كەيىن ساياسي ۇراندارعا ۇلاسىپ، يسلام رەسپۋبليكاسىن جويۋ جانە مونارحيانى قالپىنا كەلتىرۋ جونىندەگى ۇندەۋلەر پايدا بولدى.
پرەزيدەنت ماسۋد پەزەشكيان بەيبىت نارازىلىق بىلدىرۋشىلەرگە قارسى كۇش قولدانباۋ تۋرالى تاپسىرما بەرگەنىمەن، كەيىنىرەك يراننىڭ ۇلتتىق قاۋىپسىزدىك كەڭەسى شەرۋلەرگە قارسى زاڭ اياسىندا قاتاڭ شارالار قولدانىلاتىنىن مالىمدەدى. قۇزىرلى ورگاندار نارازىلىق بىلدىرۋشىلەردى قاۋىپسىزدىككە قاتەر توندىرۋشىلەر دەپ اتادى.
قازىرگى ۋاقىتتا نارازىلىق اكتسيالارى يراننىڭ 111 قالا مەن ەلدى مەكەنىن قامتىعان.
