اقش پرەزيدەنتى دونالد ترامپ يرانعا قارسى اۋقىمدى ەكونوميكالىق سوعىس باستالعانىن مالىمدەدى. بۇل تۋرالى ول 20 تامىزدا ءوزىنىڭ Truth Social الەۋمەتتىك جەلىسىندەگى پاراقشاسىندا جازدى، دەپ حابارلايدى «ادىرنا» ءتىلشىسى.
«بۇگىن مەن ەڭ جويقىن ەكونوميكالىق وپەراتسيانى باستايتىنىمدى جاريالايمىن. بۇل بۇرىن-سوڭدى بولماعان اۋقىمداعى ەكونوميكالىق سوعىس پەن وقشاۋلاۋ بولادى»، – دەپ جازدى ترامپ.
سونىمەن قاتار ول يراندى قولدايتىن نەمەسە ونىمەن بيزنەس جۇرگىزەتىن كەز كەلگەن ەلگە «اسا قاتاڭ» سانكتسيالار سالىناتىنىن ەسكەرتتى.
«يران تاراپىنان تونەتىن قاۋىپ-قاتەردى وقشاۋلاپ، جەڭۋ ءۇشىن بارلىق وداقتاسىمىزدىڭ قولداۋى قاجەت»، – دەپ اتاپ ءوتتى ترامپ.
بۇعان دەيىن اقش يراننىڭ مۇناي، تەڭىز تاسىمالى جانە قارجى سەكتورلارىنا اۋقىمدى سانكتسيالار ەنگىزىپ، تەگەراننىڭ ەنەرگيا رەسۋرستارىن ەكسپورتتاۋدان تۇسەتىن تابىسىن شەكتەۋگە تىرىسقان بولاتىن. ترامپتىڭ سوڭعى مالىمدەمەسى ءساۋىر ايىنىڭ باسىندا جاريالانعان «ەكونوميكالىق قاھار» وپەراتسياسى اياسىنداعى قىسىم ناۋقانىنىڭ جالعاسى بولۋى مۇمكىن.
18 تامىزدا بىرىككەن اراب امىرلىكتەرى يرانمەن بارلىق ساۋدا-ساتتىقتى، كوممەرتسيالىق الماسۋدى جانە قارجىلىق وپەراتسيالاردى قوسىمشا ەسكەرتۋگە دەيىن توقتاتاتىنىن مالىمدەگەن ەدى.
ءباا بيلىگى تەگەراندى ەل اۋماعىنا قاراي ەكى زىمىران ۇشىردى دەپ ايىپتاپ، شابۋىلدىڭ نىساناسى تەڭىزدەگى كەمە قاتىناسى بولعانىن مالىمدەدى. يران بۇل ايىپتاۋلاردى جوققا شىعاردى.
