ەلىمىزدە ۇبت باستالدى

قاڭتار ايىندا وتەتىن ۇلتتىق بىرىڭعاي تەستىلەۋ (ۇبت) باستالدى، دەپ حابارلايدى "ادىرنا" ءتىلشىسى.

قر عىلىم جانە جوعارى ءبىلىم مينيسترلىگى ۇبت 10 اقپانعا دەيىن جالعاساتىنىن حابارلادى. 

بيىل ۇبت-عا 187 مىڭعا جۋىق ادام قاتىسۋعا ءوتىنىش بەرگەن. بۇل وتكەن جىلمەن سالىستىرعاندا 20 مىڭعا كوپ. تەستىلەۋگە تىركەلگەن تالاپكەرلەردىڭ 75,2%-ى قازاق تىلىندە، 24,6%-ى ورىس تىلىندە، ال 189 ادام اعىلشىن تىلىندە تاپسىرۋدى تاڭداعان.

ەڭ كوپ تاڭدالعان بەيىندىك پاندەر كومبيناتسياسى – «ماتەماتيكا-فيزيكا» (19,2%). بۇل باعىت ينجەنەرلىك، تەحنيكالىق، ەنەرگەتيكالىق، قۇرىلىس جانە پەداگوگيكالىق ماماندىقتارعا تۇسۋگە نيەتتى تالاپكەرلەرگە ارنالعان. ال «بيولوگيا-حيميا» كومبيناتسياسىن 16,9%، «شىعارماشىلىق ەمتيحان» پاندەرىن 9,7% تالاپكەر تاڭداعان.

2026 جىلى ۇبت فورماتى وزگەرىسسىز قالادى. ياعني، تالاپكەرلەر ۇش مىندەتتى ءپان جانە ەكى بەيىندىك ءپان تاپسىرادى. تەستىلەۋ تاپسىرمالارىنىڭ جالپى سانى – 120, ەڭ جوعارى بالل – 140. تەستىلەۋ ۋاقىتى 4 ساعات (240 مينۋت), ەرەكشە ءبىلىم بەرۋ قاجەتتىلىكتەرى بار تالاپكەرلەر ءۇشىن قوسىمشا 40 مينۋت بەرىلگەن.

ال شىعارماشىلىق ەمتيحاندى تاڭداعان تۇلەكتەر وقۋ ساۋاتتىلىعى مەن قازاقستان تاريحى پانىنەن مىندەتتى تەستتى تاپسىرادى.