Қаңтар айында өтетін Ұлттық бірыңғай тестілеу (ҰБТ) басталды, деп хабарлайды "Адырна" тілшісі.
ҚР ғылым және жоғары білім министрлігі ҰБТ 10 ақпанға дейін жалғасатынын хабарлады.
Биыл ҰБТ-ға 187 мыңға жуық адам қатысуға өтініш берген. Бұл өткен жылмен салыстырғанда 20 мыңға көп. Тестілеуге тіркелген талапкерлердің 75,2%-ы қазақ тілінде, 24,6%-ы орыс тілінде, ал 189 адам ағылшын тілінде тапсыруды таңдаған.
Ең көп таңдалған бейіндік пәндер комбинациясы – «Математика-физика» (19,2%). Бұл бағыт инженерлік, техникалық, энергетикалық, құрылыс және педагогикалық мамандықтарға түсуге ниетті талапкерлерге арналған. Ал «Биология-химия» комбинациясын 16,9%, «Шығармашылық емтихан» пәндерін 9,7% талапкер таңдаған.
2026 жылы ҰБТ форматы өзгеріссіз қалады. Яғни, талапкерлер үш міндетті пән және екі бейіндік пән тапсырады. Тестілеу тапсырмаларының жалпы саны – 120, ең жоғары балл – 140. Тестілеу уақыты 4 сағат (240 минут), ерекше білім беру қажеттіліктері бар талапкерлер үшін қосымша 40 минут берілген.
Ал шығармашылық емтиханды таңдаған түлектер оқу сауаттылығы мен қазақстан тарихы пәнінен міндетті тестті тапсырады.
