قازاقستان زاڭگەرلەر وداعى كونستيتۋتسياعا ءدىندى مەملەكەتتەن ءبولۋ نورماسىن ەنگىزۋدى ۇسىندى، دەپ حابارلايدى "ادىرنا" ۇلتتىق پورتالى.
«قازاقستان زاڭگەرلەر وداعى» رەسپۋبليكالىق قوعامدىق بىرلەستىگىنىڭ توراعاسى، ۇلتتىق قۇرىلتاي مۇشەسى سەرىك اقىلباي كونستيتۋتسيالىق كوميسسيانىڭ وتىرىسىندا كونستيتۋتسياعا ءدىندى مەملەكەتتەن ءبولۋ تۋرالى ناقتى نورمانى ەنگىزۋ ۇسىنىسىن جاسادى.
سەرىك اقىلبايدىڭ ايتۋىنشا، قازىرگى كونستيتۋتسيادا زايىرلىلىق ءپرينتسيپى بار بولسا دا، ول جاناما تۇردە كورسەتىلگەندىكتەن، زاڭ قولدانۋدا تۇسىنبەۋشىلىك تۋعىزۋى مۇمكىن. ونىڭ پىكىرىنشە، ءدىندى مەملەكەتتەن ءبولۋ مەملەكەتتىك ورگاندار مەن ءدىني بىرلەستىكتەر اراسىنداعى شەكارانى ناقتى بەلگىلەپ، بارلىق ازاماتتارعا تەڭ جانە بەيتاراپ كوزقاراستى قامتاماسىز ەتەدى.
«بۇل نورما ازاماتتاردىڭ سەنىم بوستاندىعىن شەكتەمەيدى، كەرىسىنشە، ونى قۇقىقتىق كەپىلدىكپەن قورعايدى. كونستيتۋتسيا جوعارى زاڭ كۇشى اكتىسى رەتىندە وسىنداي سەزىمتال سالادا كەڭەيتىلگەن تۇسىندىرمەلەرگە جول بەرمەۋى كەرەك»، — دەدى اقىلباي.
