ازەربايجان پرەزيدەنتى يلحام اليەۆ 5 قاڭتار كۇنى وسى ەلدە تىركەلگەن تەلەارنالارعا بەرگەن سۇحباتىندا ەلدىڭ سىرتقى ساياساتتاعى ماڭىزدى جەتىستىكتەرىنىڭ ءبىرى – ورتالىق ازيا (وا) مەملەكەتتەرىنىڭ كونسۋلتاتيۆتىك كەڭەسىنە تولىققاندى مۇشە بولىپ قابىلدانۋىن اتاپ ءوتتى، دەپ حابارلايدى "ادىرنا" ۇلتتىق پورتالى Report-قا سىلتەپ.
مەملەكەت باسشىسىنىڭ ايتۋىنشا، بۇل شەشىم گەوگرافيالىق تۇرعىدان ەرەكشە ءارى ساياسي-ديپلوماتيالىق تۇرعىدان ماڭىزدى وقيعا سانالادى.
"گەوگرافيا جاعىنان ءبىز ورتالىق ازيادا ەمەس، وڭتۇستىك كاۆكازدا ورنالاسقانبىز. الايدا ورتالىق ازيا ەلدەرىمەن ەكىجاقتى جانە كوپجاقتى فورماتتاعى بايلانىستارىمىز وتە تىعىز. سوڭعى جىلدارى بىرلەسكەن جوبالار ايتارلىقتاي كوبەيدى. وسىنىڭ ناتيجەسىندە بۇل ەلدەر ءبىزدى ءبىراۋىزدان تولىققاندى مۇشە رەتىندە قابىلدادى. مۇنى ۇلكەن ساياسي جانە ديپلوماتيالىق جەتىستىك دەۋگە بولادى", – دەدى يلحام اليەۆ.
پرەزيدەنتتىڭ سوزىنشە، ول بۇعان دەيىن ەكى جىل قاتارىنان ورتالىق ازيا سامميتتەرىنە قۇرمەتتى قوناق رەتىندە شاقىرىلعان. ال ءۇشىنشى سامميتتە ازەربايجان رەسمي تۇردە كەڭەستىڭ تولىققاندى مۇشەسىنە اينالعان.
يلحام اليەۆ ورتالىق ازيا مەن ازەربايجان اراسىنداعى ىنتىماقتاستىقتىڭ، سونداي-اق «س5» فورماتىنان «س6» فورماتىنا كوشۋىنىڭ ايماق قانا ەمەس، بۇكىل الەم ءۇشىن ماڭىزى زور ەكەنىن ايتتى. ونىڭ پىكىرىنشە، قازىرگى گەوساياسي جاعدايدا كولىك، لوگيستيكا جانە بايلانىستىڭ ءرولى ايتارلىقتاي ارتقان.
"ورتالىق ازيانى باتىسپەن گەوگرافيالىق تۇرعىدا سەنىمدى تۇردە بايلانىستىرا الاتىن جالعىز ەل – ازەربايجان. بالاما باعىتتار بار بولعانىمەن، قازىرگى گەوساياسي جاعدايدا ولار باتىس ءۇشىن قولايلى دەپ سانالمايدى. سوندىقتان ءبىزدىڭ ءتىرى كوپىر ءارى سەنىمدى سەرىكتەس رەتىندەگى ءرولىمىز ارتا بەرەدى", – دەدى ول.
مەملەكەت باسشىسى سوڭعى ۋاقىتتا ازەربايجان اۋماعى ارقىلى وتەتىن جۇك كولەمى كۇرت ءوسىپ جاتقانىن اتاپ ءوتتى. العاش رەت ەل اۋماعى ارقىلى 100 مىڭ كونتەينەر تاسىمالدانعان.
"بۇل - تەك باستاماسى. الداعى ۋاقىتتا جۇك كولەمى بىرنەشە ەسە ارتادى. وسىعان بايلانىستى ءبىز كولىك ينفراقۇرىلىمىن كەڭەيتۋگە قوسىمشا قاراجات ءبولىپ جاتىرمىز جانە بۇل جۇمىس جالعاسادى", – دەدى پرەزيدەنت.
سونىمەن قاتار، يلحام اليەۆ 2024 جىلدىڭ قاراشا ايىندا باكۋدە ازەربايجان، قازاقستان جانە وزبەكستان پرەزيدەنتتەرى كاسپي تەڭىزىنىڭ تۇبىمەن ەنەرگەتيكالىق كابەل تارتۋ تۋرالى كەلىسىمگە قول قويعانىن ەسكە سالدى. جوبا اياسىندا تالشىقتى-وپتيكالىق كابەل توسەۋ جانە وزگە دە كوممۋنيكاتسيالىق جوبالار جۇزەگە اسىرىلماق.
"ازەربايجاندى بۇل توپقا رەسمي تۇردە قابىلداي وتىرىپ، ورتالىق ازيا ەلدەرى بىزگە ۇلكەن قۇرمەت كورسەتتى جانە ستراتەگيالىق كورەگەندىك تانىتتى. بۇل شەشىم ايماقتاعى گەوساياسي احۋالدى تۇبەگەيلى وزگەرتەدى", – دەپ تۇيىندەدى ازەربايجان پرەزيدەنتى.
ايتا كەتەيىك، بۇعان دەيىن ەل پرەزيدەنتىنىڭ سۇحباتىندا ءتىل ماسەلەسى كوتەرىلگەن ەدى.
