Äzerbaijan prezidentı İlham Äliev 5 qaŋtar künı osy elde tırkelgen telearnalarǧa bergen sūhbatynda eldıŋ syrtqy saiasattaǧy maŋyzdy jetıstıkterınıŋ bırı – Ortalyq Aziia (OA) memleketterınıŋ konsultativtık keŋesıne tolyqqandy müşe bolyp qabyldanuyn atap öttı, dep habarlaidy "Adyrna" ūlttyq portaly Report-qa sıltep.
Memleket basşysynyŋ aituynşa, būl şeşım geografiialyq tūrǧydan erekşe ärı saiasi-diplomatiialyq tūrǧydan maŋyzdy oqiǧa sanalady.
"Geografiia jaǧynan bız Ortalyq Aziiada emes, Oŋtüstık Kavkazda ornalasqanbyz. Alaida Ortalyq Aziia elderımen ekıjaqty jäne köpjaqty formattaǧy bailanystarymyz öte tyǧyz. Soŋǧy jyldary bırlesken jobalar aitarlyqtai köbeidı. Osynyŋ nätijesınde būl elder bızdı bırauyzdan tolyqqandy müşe retınde qabyldady. Mūny ülken saiasi jäne diplomatiialyq jetıstık deuge bolady", – dedı İlham Äliev.
Prezidenttıŋ sözınşe, ol būǧan deiın ekı jyl qatarynan Ortalyq Aziia sammitterıne qūrmettı qonaq retınde şaqyrylǧan. Al üşınşı sammitte Äzerbaijan resmi türde keŋestıŋ tolyqqandy müşesıne ainalǧan.
İlham Äliev Ortalyq Aziia men Äzerbaijan arasyndaǧy yntymaqtastyqtyŋ, sondai-aq «S5» formatynan «S6» formatyna köşuınıŋ aimaq qana emes, bükıl älem üşın maŋyzy zor ekenın aitty. Onyŋ pıkırınşe, qazırgı geosaiasi jaǧdaida kölık, logistika jäne bailanystyŋ rölı aitarlyqtai artqan.
"Ortalyq Aziiany Batyspen geografiialyq tūrǧyda senımdı türde bailanystyra alatyn jalǧyz el – Äzerbaijan. Balama baǧyttar bar bolǧanymen, qazırgı geosaiasi jaǧdaida olar Batys üşın qolaily dep sanalmaidy. Sondyqtan bızdıŋ tırı köpır ärı senımdı serıktes retındegı rölımız arta beredı", – dedı ol.
Memleket basşysy soŋǧy uaqytta Äzerbaijan aumaǧy arqyly ötetın jük kölemı kürt ösıp jatqanyn atap öttı. Alǧaş ret el aumaǧy arqyly 100 myŋ konteiner tasymaldanǧan.
"Būl - tek bastamasy. Aldaǧy uaqytta jük kölemı bırneşe ese artady. Osyǧan bailanysty bız kölık infraqūrylymyn keŋeituge qosymşa qarajat bölıp jatyrmyz jäne būl jūmys jalǧasady", – dedı prezident.
Sonymen qatar, İlham Äliev 2024 jyldyŋ qaraşa aiynda Bakude Äzerbaijan, Qazaqstan jäne Özbekstan prezidentterı Kaspii teŋızınıŋ tübımen energetikalyq kabel tartu turaly kelısımge qol qoiǧanyn eske saldy. Joba aiasynda talşyqty-optikalyq kabel töseu jäne özge de kommunikasiialyq jobalar jüzege asyrylmaq.
"Äzerbaijandy būl topqa resmi türde qabyldai otyryp, Ortalyq Aziia elderı bızge ülken qūrmet körsettı jäne strategiialyq köregendık tanytty. Būl şeşım aimaqtaǧy geosaiasi ahualdy tübegeilı özgertedı", – dep tüiındedı Äzerbaijan prezidentı.
Aita keteiık, būǧan deiın el prezidentınıŋ sūhbatynda tıl mäselesı köterılgen edı.
