پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعاريننىڭ جۇبايى ءسانيا سادىقوۆا 2024 جىلى 88 678 984 تەڭگە تابىس تاپقان. بۇل دەرەكتەر مينيسترلىكتىڭ لاۋازىمدى تۇلعالارىنىڭ تابىستارى جونىندەگى اقپاراتتا كورسەتىلگەن، دەپ حابارلايدى «ادىرنا» ءتىلشىسى.
اتالعان تابىس باعالى قاعازدار نارىعىنداعى ينۆەستيتسيالاردان تۇسكەن. اتاپ ايتقاندا، بۇل — اكتسيالار مەن وزگە دە قارجى قۇرالدارى بويىنشا الىنعان ديۆيدەندتەر مەن سىياقىلار. كىرىستەر مينيستر تاراپىنان دەكلاراتسيالانعان.
جاريالانعان مالىمەتتەردە وزگە تابىس كوزدەرى نەمەسە مۇلىك تۋرالى اقپارات بەرىلمەگەن.
ودان بولەك، قۇجاتتا ۇلتتىق ەكونوميكا ۆيتسە-ءمينيسترى اسان دارباەۆتىڭ وتباسىنا قاتىستى دا دەرەكتەر جاريالاندى. وندا ونىڭ جۇبايى گۇلنۇر دارباەۆانىڭ 2024 جىلى 69,6 ملن تەڭگەتابىس دەكلاراتسيالاعانى كورسەتىلگەن.
ايتا كەتەيىك، بۇعان دەيىن مەملەكەتتىك قىزمەت ىستەرى اگەنتتىگى شەنەۋنىكتەردىڭ تابىسى مەن مۇلكى تۋرالى مىندەتتى تۇردە جاريالاناتىن مالىمەتتەردىڭ جاڭا، قىسقارتىلعان تىزبەسىن بەكىتكەن بولاتىن. قازىرگى تاڭدا ەسەپتە تەك ءۇش دەرەك قانا كورسەتىلەدى:
دەكلاراتسيا تاپسىرۋشىنىڭ جانە ونىڭ جۇبايىنىڭ (جۇبايىنىڭ) تەگى، اتى، اكەسىنىڭ اتى;
ەسەپتىك سالىق كەزەڭى;
سالىق سالىناتىن جالپى تابىس سوماسى.
ال بۇرىن مەملەكەتتىك قىزمەتكەرلەر بانك شوتتارىنداعى قاراجاتتى (ونىڭ ىشىندە شەتەلدىك بانكتەردەگى), مۇلىك ساتۋدان تۇسكەن كىرىستەردى جانە وزگە دە تابىس كوزدەرىن كورسەتۋگە مىندەتتى بولعان.
