پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين جۋرناليستەردىڭ سۇراعىنا جاۋاپ بەرۋدەن باس تارتتى، دەپ حابارلايدى «ادىرنا» ءتىلشىسى.
سەنات وتىرىسىنىڭ بريفينگىندە BES.media ءجۋرناليسى مينيسترلىكتىڭ مالىمەتى بويىنشا 200 ملرد تەڭگەدەن استام سالىقتى بيۋدجەتكە تولەمەگەن كومپانياعا قاتىستى سۇراق قويدى. سەرىك جۇمانعارين ول كومپانيانىڭ اتىن اتاۋدان باس تارتىپ، جۋرناليستەر ورتاسىنان مۇرنىن ءشۇيىرىپ ءوتىپ، زالدان شىعىپ كەتتى. ودان كەيىن قويىلعان قوسىمشا سۇراقتار دا جاۋاپسىز قالدى.
بۇعان دەيىن جوعارى شەندى شەنەۋنىك احقو كەسىرىنەن ميللياردتاعان سالىق تولەنبەيتىنىن ايتقان ەدى.
ء«بىز سالىقتى جوعالتىپ جاتىرمىز، ويتكەنى احقو قازاقستانداعى قانداي دا ءبىر قوسىمشا وففشورعا اينالۋى مۇمكىن. مەن ناقتى كاسىپورىنداردى اتاماي-اق قويايىن، بىراق سولاردىڭ ءبىرى باس كەڭسەسىن حولدينگ ارقىلى سول جەرگە كوشىرگەن. سونىڭ سالدارىنان ءبىز كتس پەن ققس سالىقتارىنان 200 ميللياردتان استام شىعىنعا ۇشىرادىق»،–دەدى ول.
ەسكە سالايىق، اقپان ايىندا سەرىك جۇمانعارين قوسىلعان قۇن سالىعىن كوتەرۋ جايلى باستامانىڭ اۆتورىن اتاۋدان باس تارتىپ، ماسەلەنى جابۋدى سۇراعان بولاتىن. جۋرناليستەردىڭ سۇراعىنا ول «ونى نە ىستەيسىز؟» دەپ قارسى ساۋال قويعان.
ال 2024 جىلدىڭ قازانىندا ۇكىمەت بريفينگىندە جۇمانعارينگە «پرەمەر-مينيستر بولعىڭىز كەلە مە؟» دەگەن سۇراق قويىلدى. مينيستر بۇل سۇراققا دا جاۋاپ بەرۋدەن باس تارتتى.
جۇمانعارين ۇلتتىق ەكونوميكا ءمينيسترىنىڭ ورىنباسارى لاۋازىمىندا بولعان كەزدە دە سىنعا ۇشىراعان بولاتىن. ول 2019 جىلى تاريفتەر جايلى قويعان جۋرناليستەردىڭ سۇراعىنا «جىنىمدى كەلتىرمەشى» دەپ جاۋاپ قاتقان. كەيىن شەنەۋنىك بۇل ءسوزى ءۇشىن باق وكىلدەرىنەن كەشىرىم سۇرادى.
