پاۆلودار وبلىسى 2028 جىلعا قاراي دوتاتسيالىق ايماقتار قاتارىنان شىعىپ، قارجىلاي تۇرعىدان ءوزىن-ءوزى قامتاماسىز ەتەتىن وڭىرگە اينالادى، دەپ حابارلايدى "ادىرنا" ۇلتتىق پورتالى.
پاۆلودار وبلىسى دامۋ جولىنداعى ماڭىزدى كەزەڭگە جاقىنداپ كەلەدى. 2028 جىلعا قاراي ءوڭىر تولىقتاي دوتاتسيالىق ايماقتار قاتارىنان شىعىپ، قارجىلاي تۇرعىدان ءوزىن-ءوزى قامتاماسىز ەتەتىن دەڭگەيگە جەتەدى.
بۇل – وبلىس ءوز شىعىندارىن رەسپۋبليكالىق بيۋدجەتسىز, تەك ىشكى كىرىس كوزدەرى ەسەبىنەن وتەي الادى دەگەن ءسوز. مۇنداي ناتيجەگە ءوڭىردىڭ جۇيەلى ينۆەستيتسيالىق ساياساتى مەن بيزنەستى قولداۋعا باعىتتالعان ناقتى قادامدارىنىڭ ارقاسىندا قول جەتكىزىلۋدە.
بۇگىندە پاۆلودار وبلىسىندا ونەركاسىپ، ەنەرگەتيكا، لوگيستيكا جانە قايتا وڭدەۋ سالالارىندا ءىرى ينۆەستيتسيالىق جوبالار جۇزەگە اسىرىلۋدا. ءوڭىرگە جاڭا كومپانيالار كەلىپ، زاماناۋي وندىرىستەر اشىلىپ، جۇمىس ورىندارى كوبەيۋدە. ەكونوميكاعا تىڭ سەرپىن بەردى. ەرتىس-بايان ءوڭىرى ينۆەستيتسيا قۇيۋعا قولايلى ءوڭىر بولىپ تۇر. ايماقتا ءوندىرىس باستاپ، دامىتۋعا نيەتتى كاسىپكەرلەرگە بارلىق جاعدايلار جاسالۋدا.
تۇراقتى ينۆەستيتسيالىق ساياساتتىڭ ناتيجەسىندە ايماقتىڭ سالىق تۇسىمدەرى جىلدان جىلعا ءوسىپ كەلەدى. ال بۇل – بولاشاقتاعى تولىق قارجىلىق دەربەستىكتىڭ بەرىك نەگىزى. ينۆەستيتسيالىق بەلسەندىلىك ءوڭىر ەكونوميكاسىنىڭ جاڭا دەڭگەيگە كوتەرىلۋىنە باستى قوزعاۋشى كۇش بولىپ وتىر.
بولجام ەل ۇكىمەت تاراپىنان راستالدى.
قر پارلامەنتى ءماجىلىسىنىڭ دەپۋتاتتارىنا «2026-2028 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىن تانىستىرعان پرەمەر-ءمينيستردىڭ ورىنباسارى سەرىك جۇمانعارين 2028 جىلعا قاراي پاۆلودار وبلىسى قارجىلاي تۇرعىدان ءوزىن-ءوزى قامتاماسىز ەتەدى دەپ مالىمدەدى.
دەمەك، ءۇش جىلدان كەيىن پاۆلودار وبلىسى رەسپۋبليكالىق ترانسفەرتتەرگە سۇيەنبەي، بارلىق شىعىندارىن ءوز كىرىستەرى ارقىلى قارجىلاندىرا الادى.
ءوڭىر ءۇشىن بۇل نەنى بىلدىرەدى؟
ءوزىن-ءوزى قامتاماسىز ەتەتىن ءوڭىر مارتەبەسى بيۋدجەت قالىپتاستىرۋدا دەربەستىكتى ارتتىرىپ، ءوز دامۋ باعدارلامالارىن كەڭىنەن جۇزەگە اسىرۋعا, ينۆەستيتسيالىق تارتىمدىلىقتى كۇشەيتۋگە، ينفراقۇرىلىم ساپاسى مەن الەۋمەتتىك سالانىڭ الەۋەتىن ودان ارى جاقسارتۋعا جول اشادى.
ياعني پاۆلودار وبلىسى تۇتىنۋشى ايماقتان ءوندىرۋشى، جاڭا ەكونوميكالىق مۇمكىندىكتەر جاسايتىن وڭىرگە اينالادى.
