اقش ارنايى كۇشتەرى تاراپىنان ۇستالعان ۆەنەسۋەلا پرەزيدەنتى نيكولاس مادۋرو نيۋ-يوركتىڭ وڭتۇستىك وكرۋگىنىڭ فەدەرالدىق سوتىندا العاشقى تىڭداۋدا ءوزىن كىنالى دەپ مويىنداماي، ءالى دە زاڭدى پرەزيدەنت ەكەنىن مالىمدەدى، دەپ حابارلايدى "ادىرنا" ۇلتتىق پورتالى.
ول وزىنە تاعىلعان ايىپتاردى جوققا شىعارىپ، ءوزىن «سوعىس تۇتقىنى» دەپ اتادى.
مادۋروعا «ناركوتەرروريزمگە قاتىسۋ»، اۆتوماتتى قارۋ مەن جارىلعىش زاتتاردى ساقتاۋ جانە قىلمىستىق ءسوز بايلاسۋ باپتارى بويىنشا ايىپ تاعىلعان. ونىڭ جۇبايى سيليا فلورەس تە سوتتا كىناسىن مويىنداۋدان باس تارتتى. كەلەسى سوت وتىرىسى 17 ناۋرىزعا بەلگىلەندى.
وسى ۋاقىتتا ۆەنەسۋەلادا بيلىك ۋاقىتشا پرەزيدەنت رەتىندە دەلسي رودريگەسكە ءوتتى. ول اقش-تى حالىقارالىق قۇقىق اياسىندا ىنتىماقتاستىققا شاقىرىپ، بىرلەسكەن دامۋ مۇمكىندىگىن قاراستىرۋدى ۇسىنعان. الايدا اقش پرەزيدەنتى دونالد ترامپ رودريگەسكە ەسكەرتۋ جاساپ، «دۇرىس شەشىم قابىلداماسا»، اۋىر سالدارعا تاپ بولۋى مۇمكىن ەكەنىن ايتتى.
كۋبا بيلىگى كاراكاستاعى وپەراتسيا كەزىندە 32 كۋبالىق اسكەري قىزمەتكەردىڭ قازا تاپقانىن حابارلادى. ال اقش مەملەكەتتىك حاتشىسى ماركو رۋبيو ۆاشينگتوننىڭ ۆەنەسۋەلامەن سوعىس جاعدايىندا ەمەس ەكەنىن مالىمدەدى. ونىڭ ايتۋىنشا، اقش-تىڭ ارەكەتتەرى ەسىرتكى ساۋداسىنا قارسى باعىتتالعان.
دونالد ترامپ NBC News-كە بەرگەن سۇحباتىندا ۆەنەسۋەلادا جاقىن ارادا سايلاۋ وتپەيتىنىن ايتىپ، ەلدى «قالىپتى جاعدايعا كەلتىرۋ ءۇشىن ۋاقىت قاجەت» ەكەنىن جەتكىزدى. سونداي-اق ول امەريكالىق مۇناي كومپانيالارى ۆەنەسۋەلادا ينفراقۇرىلىمدى قالپىنا كەلتىرۋ ءۇشىن جۇمىس ىستەيتىنىن اتاپ ءوتتى.
«ۆەنەسۋەلا ءۇشىن كىم جاۋاپتى؟» دەگەن سۇراققا ترامپ قىسقا عانا: «مەن»، – دەپ جاۋاپ بەردى.
"رەسەي اسپانىن بەلگىسىز اسكەري ۇشاقتار تورىدى" - شۇعىل تۇردە سانكت-پەتەربوردىڭ اۋە كەڭىستىگى جابىلدى
