فوتو: JUSTIN TALLIS/AFP
انگليانىڭ كەمبريدجشير گرافتىعىندا پويىزعا بەلگىسىز ادامدار پىشاقپەن شابۋىل جاساپ، ون ادام جاراقات الدى. ولاردىڭ توعىزى اۋىر حالدە اۋرۋحانادا جاتىر. بۇل تۋرالى ۆۆس جازدى، دەپ حابارلايدى “ادىرنا”.
وقيعا 1 قاراشا كەشكى ۋاقىتتا دونكاستەر قالاسىنان لوندونداعى King’s Cross ۆوكزالىنا باعىت العان پويىزدا بولعان. پوليتسيا دەرەگىنشە، شابۋىل پويىز كەمبريدجشير اۋماعىندا كەلە جاتقاندا ورىن العان.
شابۋىلدان كەيىن پويىز حانتينگدون ستانتسياسىندا جوسپاردان تىس توقتاۋعا ءماجبۇر بولدى. وقيعا ورنىنا جەدەل جاردەم، پوليتسيا جانە ءورت ءسوندىرۋ قىزمەتىنىڭ كوپتەگەن قىزمەتكەرلەرى جەتتى.
پوليتسيانىڭ حابارلاۋىنشا، توعىز جولاۋشى ومىرىنە قاۋىپ توندىرەتىن جاراقات العان، تاعى ءبىر ادام جەڭىل جاراقاتپەن ەم قابىلداۋدا.
قۇقىق قورعاۋ ورگاندارى ەكى كۇدىكتىنى قاماۋعا الدى. تەرگەۋ جۇمىستارى انتيتەررورلىق بولىمشەنىڭ قولداۋىمەن جۇرگىزىلىپ جاتىر.
پويىز قوزعالىسى ۋاقىتشا توقتاتىلىپ، ايماق بويىنشا كولىك قاتىناسىنا دا شەكتەۋلەر قويىلعان. پوليتسيا تۇرعىنداردان تىنىشتىق ساقتاۋدى جانە رەسمي اقپارات كوزدەرىنە جۇگىنۋدى سۇرادى.
