قر ساۋدا جانە ينتەگراتسيا ءمينيسترى ارمان شاققاليەۆ 1 قاڭتاردا ەلورداداعى ساۋدا جەلىلەرىنە مونيتورينگ جۇمىستارىن جۇرگىزدى. ۆەدومستۆو باسشىسى ءىرى Small, Magnum, انۆار ساۋدا جەلىلەرىن ارالادى.
ساۋدا جەلىلەرى بۇگىن 10:00-دە ءوز جۇمىسىن باستادى. العاشقى كەلۋشىلەردىڭ ءبىرى بولعان ساۋدا ءمينيسترى باعا تۇراقتىلىعى مەن سورەدەگى تاۋارلاردىڭ قولجەتىمدىلىگىنە، اسسورتيمەنتىنە باسا نازار اۋداردى.
ء“بىز ارنايى 1-قاڭتاردا ساۋدا جەلىلەرىن ارالاپ شىقتىق. ماقساتىمىز - بۇگىنگى باعانىڭ تۇراقتى ەكەنىنە كوز جەتكىزۋ. ەشقانداي وزگەرىس، تاپشىلىق جوق. جاڭا جىلدىڭ الدىندا ءبىز ساۋدا جەلىلەرىمەن بىرلەسىپ بەرەكە fest اكتسياسىن وتكىزدىك. ساۋدا جەلىلەرى ءالى دە ءتۇرلى جەڭىلدىكتەر ۇسىنىپ جاتىر. سورەدە تاۋار تولى. وسىنداي تۇراقتى جاعداي بارلىق ساۋدا وبەكتىسىندە بولۋى كەرەك”،-دەدى ارمان شاققاليەۆ.
ساۋدا جەلىلەرىنىڭ وكىلدەرىمەن كەزدەسكەن مينيستر باعانى تۇراقتى ۇستاۋدى جانە ونى نەگىزسىز وسىرمەۋدى تاپسىردى. سونداي-اق مينيستر الەۋمەتتىك ماڭىزى بار ازىق-تۇلىك تاۋارلارىنىڭ ساۋدا ۇستەمەسىنە باقىلاۋ جۇمىسى جۇيەلى جۇرگىزىلىپ جاتقانىن ەسكە سالدى.
مۇنداي مونيتورينگ جۇمىستارىن ءمينيستردىڭ تاپسىرماسىمەن وڭىرلەردەگى ساۋدا جانە تۇتىنۋشىلاردىڭ قۇقىعىن قورعاۋ دەپارتامەنتتەرى جەرگىلىكتى اكىمدىكپەن بىرلەسىپ بەلسەندى جۇرگىزىپ جاتىر. ايتا كەتۋ كەرەك سوڭعى 6 اپتا بويى ءامات تاۋارلارىنىڭ باعاسى تۇراقتى.
